Shillong, Nailar 05
Ka ïingbishar Meghalaya High Court kala bthah ïa ka Shillong Municipal Board (SMB) ba kan aiti ïa ka jubab ba thikna halor ka jingkynnoh ba katto katne ngut ki nongshong dukan madan kim pat ïoh satia ïa ki Certificate of Vending (CoV).
Ka Division Bench ba kynthup ïa u Chief Justice IP Mukerji bad Justice W Diengdoh, kila pynmih ïa kane ka hukum hadien ba shong bishar ïa ka Public Interest Litigation (PIL) ba ïadei bad ka jingkyndang bad pynkynriah ïa ki nongshong dukan madan na ka thaiñ Khyndailad, Shillong.
Ka kaiphod ba dang shen bala aiti da u Special Officer bad senior Advocate Subhasis Chakrawarty kala pynpaw ba ka jingpynkynriah ïa ki dukan madan kala ïaid suk bad ka long kaba jop.
Une u Special Officer bala thung da ka ïingbishar, u la pyntip ba ka jingkyndang bad jingpynkynriah ïa ki nongshong dukan madan bym don licence na ka thaiñ Khyndailad ruh la pyndep hapdeng ka jingjai jai.
Ka Shillong Roadside Hawkers’ Association kala kynnoh ba katto katne ki nongshong dukan madan kiba dei hok ban ïoh ïa ka CoV, kim pat ïoh satia haduh mynta, kaba pynbor ïa u Special Officer ban thoh sha u Chief Executive Officer (CEO) ka SMB ba un ai jubab.
Ka ïingbishar kala bthah ïa ka SMB ba kan ai ïa ka jubab da ka affidavit, ka ban sa sam sha baroh ki liang mamla jong ka mukotduma.
“Ai ba ïa ka kopi jong ka kaiphod u Special Officer yn sam sha baroh ki nongïasaid aiñ lashai ka sngi ka 6 tarik Nailar. Ai ba ki kopi jong ka kaiphod halor ka jubab ka SMB ban file hapoh ka 11 tarik Nailar, yn sam sha baroh ki liang mamla,” ong ka hukum.
Ïa kane ka PIL la buh ban shong bishar biang ha ka 13 tarik Nailar 2025.
