Shillong, Nailar 05
Ka Malaysian Armed Forces FT ka la pynkut da ka jingjop ha ka lympung ïalehkai 134th Durand Cup 2025 hadien ba la lah ban pynliem noh ïa ka Rangdajied United FC da 1-0 kol ha ka sngi Ba-ar ha JN Stadium, Polo.
Kane ka nam jop ka la wan urlong lyngba ka shi kol ba la thep da u Nasir Yasa ha ka minit kaba 68 na ka bynta ban khur ïa ki lai point.
Watla ka la shah rem ha ka Shillong Lajong bad NorthEast United, ka Malaysian Armed Forces ka la pyrshang ban ïalehkai bha. Kumjuh ka Rangdajied kaba la khmih lynti ban wanphai da ka jingjop watla ka la shah rem ha ka Lajong ha ka jingïakhun kaba nyngkong.
Te kumta ka Rangdajied ka dangsah sa kawei ka jingïakhun kaba khatduh pyrshah ïa ka NorthEast United ha ka 11 tarik.
Kumba ka long mynta ka jingïalehkai kan long ha ka 8 tarik hapdeng ka Shillong Lajong pyrshah ïa ka NorthEast United FC.
