Shillong, Nailar 05
U Nongïalam ka National People’s Party (NPP) uba long ruh u Myntri Rangbah ka Jylla, u Conrad K Sangma u la ong ba ha ka kam saiñ pyrthei ym ju don ki nongshun ba neh bad ym ju don ki paralok ba neh.
Ïa kine ki kyntien u Conrad u la kren ha ka sngi Ba-ar jong ka 5 tarik Nailar, 2025, ha ka por ba pdiang burom ïa u Bah Ronnie V Lyngdoh uba dei u MLA ka Mylliem Constituency uba la wan ban pynïasoh sha ka NPP ïa kaba la pynlong hapoh ka phyllaw jong ka ïingsah u Myntri Rangbah ha kaba la ïadon bynta da ki Nongïalam ka NPP, ki nongkyrshan bad ki bahaïing hasem jong u Bah Ronnie.
Lah ban kdew hangne ba u Bah Ronnie V Lyngdoh, uba dei tang u MLA jong ka Congress ha ka Jylla hadien ka jingsah marwei bad ka jingphet seng jong kiwei pat ki nongmihkhmat, u la phet noh na ka Congress ha ka 30 tarik Naitung bad ban leit pynïasoh noh bad ka NPP kaba dei ka seng kaba bat ïa u lakam synshar hapoh ka Jylla.
Hadien ka jingphet seng noh jong kiba bun ki Nongïalam bad MLA ka Congress ha ki por kiba la dep, u Bah Ronnie u la shong marwei ha ka liang pyrshah kum u dkhot ka Congress bad u la long u nongïalam ka liang pyrshah hapoh ka Ïingdorbar Thawaiñ ka Jylla bad hashwa ba un mih noh na ka Congress, u la bat ruh kum u Chief Whip ka liang pyrshah hapoh ka Ïingdorbar Thawaiñ ka Jylla.
Haba pdiang burom ruh ïa ki bahaïing hasem jong u Bah Ronnie, u Conrad u la ong, ban shim ïa kum kane ka rai kam long kaba suk hynrei ki dei ki bahaïing kiba ju long ki nongkyrshan ba hakhmat tam eh ha ka por ba ïakynduh jingeh ban shim ïa kum kane ka rai.
“Ki dei ki bahaïing jong phi kiba ai mynsiem ïaphi ha kum kito ki por jong ka jingeh kaba la pynlong ïaphi ba phin shim ïa ka rai ka ban pynkylla dur ïa ka jinglong jingman jong ka saiñ pyrthei. Ym dei tang hapoh Mylliem Constituency hynrei ha ka Jylla hi baroh kawei”, ong u Myntri Rangbah.
U la ong ruh ba ka dei na ki nongïalam ba hakhmat, ki nongkyrshan bad ki nongbud kiba pynlong ïa ki nongmihkhmat ban poi sha ka thong bad khlem ka jingkyrshan lang jong ki, yn nym poi satia sha ka thong.
Shuh-shuh, u la ai khublei ruh ïa u Bah Hamletson Dohling uba la long kloi ban pdiang ïa kane ka jingwan rung jong u Bah Ronnie sha ka seng khlem da pyrkhat ïa kino kino ki jingïapher jingmut hapdeng jong ki hynrei da kaba buh shwa ïa ka jingdonkam jong ki paidbah ka konstitwensi hakhmat eh bad jong ka Jylla ruh kumjuh.
U la ong ba ka NPP ka dei ka seng kaba pher tam kaba wanrah shisha ïa ka roi ka par hapoh ka Jylla bad ka dei ruh ka seng kaba ki paidbah ki lah ban shaniah ban rah ïa ka Jylla shakhmat.
“Ngi dei ka seng kaba don jingngeit ban wanrah ïa ka roi ka par lyngba ka kam saiñ pyrthei, ki prokram bapher-bapher, ki rukom treikam bad ki thong bapher-bapher, ki jingtei kiba bun kaba lehse, babun na ki briew ha ki por ba mynshwa kin pyrkhat ba kum kine kin nym wan urlong hapoh ka Jylla Meghalaya bad kine baroh ki urlong namar ka jingdon ïa ka jingpyrkhat kaba bha, ka jingkitkhlieh na ka bynta ki paidbah jong ngi bad ka jingtrei shitom jong ngi ka bym lah batai shuh kaba ngi la leh ha kine ki snem kiba lah leit noh,”ong u Conrad.
Haba ai jingkren ha ka jingïalang pdiang burom ïa u Bah Ronnie V Lyngdoh, u Myntri Rangbah u la ong ba kaei kaba neh ha ki kum ki nongïalam ka long ka jingshakri ba hok na ka bynta ki paidbah, ka Jylla bad ka Ri baroh kawei.
