Shillong, Nailar 05
U Bah Ronnie V Lyngdoh u la ong ba haduh mynta ki kjat jong u ki dang ïai kyiuh sah bad ong ba hadien ka jingmih noh jong u na ka Congress, ki don shibun kiba ai khublei ïa u hynrei ki don ruh pat kiba sngewthuh bakla ïa kane ka jingshim rai jong u ban mih noh na ka Congress bad leit pynïasoh sha ka National People’s Party (NPP).
Haba ai jingkren ha ka jingïalang pdiang burom ïa u da ka NPP ha ka sngi Ba-ar kaba la long hapoh ka phyllaw jong ka ïingsah u Myntri Rangbah ka Jylla, u Bah Ronnie V Lyngdoh, u la kren da kaba shai ba u la rai kut ban don noh bad ka NPP.
U la ong ba watla kiba bun ki buh jingkylli ïa u ba balei um mih noh na ka Congress naduh kham mynshwa, hynrei u la ai jubab da kaba ong ba ha kito ki por um ju don ïa kum kata ka jingthmu bad ong ba ka jingïatiplem jong u kam shym la shah satia ïa u ban leh kumta.
U Bah Ronnie u la ong ba kiba bun ki paidbah hapoh konstitwensi ki la kren da kaba shai ba katto u la shakri bad mynta kala dei ka por ban wanrah noh ïa ka jingroi jingpar kaba shisha bad kaba sahteng la bun snem.
“Nga la jop na ka Congress, nga don ka kamram ban ïaisah bad ïaineh bad kane ka seng bad ki briew kiba la jied ïanga hynrei katba dang mih ki sngi, nga la ïaid kylleng ka Mylliem ban ïasyllok bad ki briew jong nga, ngam leit shym ban kren hynrei nga leit da kaba plie ïa la ki jong ki shkor bad ki briew kiba nga ïakynduh naduh ki rangbah, ki samla, ki kynthei, ki nongrep, ki paralok jong ka konstitwensi, ka khubor jong ki ka long shai ban wanrah noh ïa ka roi ka par kaba shisha”, ong u Bah Ronnie.
Shuh-shuh, u Bah Ronnie u la ong ba ka jingpynsngewthuh bakla da ki briew ba ka don ka kyndon bala buh lypa na ka bynta jong u ban rung sha ka NPP kam dei kaba shisha hynrei u la bynrap da kaba ong ba ka jingpynïasoh jong u sha ka NPP ka dei namar ba u ïohi ïa ka lynti ban trei ym tang ban kren.
Da kaba ïaroh ruh ïa u Myntri Rangbah, u Bah Ronnie u la ong ba u Myntri Rangbah u dei u nongïalam uba kham sawa ka kam ban ïa ka ktien.
