Ka surok 4-Lane na Umshyrpi sha 7 Mer yn pyndep noh hapoh u Nohprah: Prestone

Shillong, Nailar 05

U Symbud Myntri Rangbah ka jylla uba khmih ruh ïa ka tnat PWD (Roads) Bah Prestone tynsong u la pyntip ba ka surok four lane na Umshyrpi shaduh Hynñiewmer yn pyndep noh hapoh u bnai Nohprah mynta u snem.

U Bah Prestone u la pyntip ïa ka jingthmu ban pyndep ïa ka surok ka dei ha ka por ba la pdiang ïa u Bah Ronnie V Lyngdoh, MLA ka Mylliem constituency ryngkat ki nongkyrshan sha ka NPP ha ka sngi Ba-ar ha phyllaw ka ïingsah u Conrad Sangma, Myntri Rangbah ka jylla.

U la ïathuh ba kane ka surok na Umshyrpi shaduh Hynñiewmer ka long 90 percent ka dei kaba hap ha Mylliem constituency.

U la pyntip ba ka surok na Lawsohtun sha Sawmer Upper Shillong, ka tnat PWD ka dang dep pynkhreh ka Detail Project Report ha ka jinglut kaba 38 klur tyngka haduh 40 klur tyngka hynrei mynta ki dang ap ïa ka jingmynjur na ka tnat Forest.

U la ong ba ha kine ki sngi ki paidbah ki ju kynnoh ba ki nongïalam NPP ki tbit bha ban pynbiej briew bad ban thied briew.

U la kyntu ïa ki paidbah ba kim dei ban sngap ïa kine ki kyntien thied briew namar kam ju don ha synshar khadar hynrei don tang ka kyntien ban shakri ïa ki paidbah.

U Bah Prestone u la ong ba u Bah Ronnie u wan rung sha ka NPP namar ka roi ka par kaba ki paidbah kiba dei nongkyrshan ki la ai jingmynjur.

Shuh shuh u la ong na bynta ka roi ka par kampher lada la don katno ka snem ha kano kano ka seng namar lehnohei lada ym ïoh ka roi ïa ki paidbah.