London, Nailar:
Ka Stella Rimington, ka Director General kynthei ba nyngkong jong ka tnat syntiat jong ka MI5 jong ka ri Britain, kaba la wanrah ïa ka juk kaba kham shai ha katei ka tnat treikam, ka la khlad noh ha kane ka por ha ka rta kaba 90 snem.
Ka Rimington, kaba ialam ia ka tnat syntiat jong katei ka ri naduh u snem 1992 haduh u snem 1996, ka dei ka riew kynthei kaba nyngkong eh ban ioh long ka heh jong katei ka tnat, kaba la pynpaw kyrteng paidbah bad hadien ka la thoh ia ka kot jingkynmaw “Open Secret” shaphang ka jingtrei jongka ha katei ka tnat kaba ju long rieh mynshwa.
Ia ka Rimington la ai ia kawei na ki burom ba ha khlieh duh jong ka ri Bilat ha ka por ba la ai nam ia ka kum ka ‘dame’ ha u snem 1996.
Ka la rung sha ka MI5 ha u snem 1969 bad ka la trei ha ki kam kiba kynthup ia ka jingpynkylla thymmai bad ka jingpyrshah ia ki kam thombor lehnoh. Hapoh ka jingialam jongka, ka MI5, ka la shim ia ka bynta kaba kham paw ha ka jingiakhun jong ka Britain pyrshah ia ki ehrang jong ka Irish Republican, katkum ka jingthoh ha ka website jong ka MI5.
Da kaba pynpaw lypa ia ka kam thoh kot jongka hadien, ka Rimington ka la plie ia kata kajuh ka jingkren da kaba pynshlur ruh ia ka rukom thoh kot jingiathuh khana lane ki ‘novel’ jong ka ri Bilat.
