Shillong, Nailar 05
Tang hadien shi sngi, ki pulit ki la ïoh ban kem noh ïa uwei u briew uba la phla ba u la tuh ïa ka bicycle na Umpling Lumdiengmet.
Katkum ka khubor na ki pulit la ong ba ha ka 3 tarik mynta u bnai, ki la ïoh ban bat noh ïa uwei u briew ba la tip kyrteng kum u Charlie Pyngrope bad la ong ba kham hadien une u briew u la kubur ba u la tuh ïa ka bicycle na ka thaiñ Umpling Lumdiengmet bad ong ba u la leit ban die ïa kane ka bicycle ha Demseiñïong, Shillong.
Na ka liang jong ki pulit ki la ïoh ban kurup noh ïa kane ka bicycle na kawei ka longkmie ba la tip kyrteng kum ka T Malngiang bad ha kaba la aiti noh ïa ka bicycle sha u trai ba dei hok.
Lah ban pynkynmaw ba ha ka 02 tarik u Nailar 2025 kawei ka durkhih ne video kaba la pyni ïa uwei u nongtuh uba la rung ha kawei ka jaka pynïeng kali bad ban tuh ïa ki tiar ki tar na katei ka jaka.
Katkum ka CCTV camera kaba la ïohpdiang la lah ban ïohi ïa uwei u briew uba la rung ha ka jaka pynïeng kali jong katei ka ïingsah ha kaba une u briew u la peit pyrman bha ïa katei ka jaka bad ban ïaid sharum shaneng ban pyrshang ban rah ïa ki tiar kat kaba u ïoh bad ruh ban rah noh tang ïa kawei ka bicycle.
