Nongstoiñ, Nailar 05
ki paidbah kynthup kynthei bad shynrang kiba hap hapoh ka lama jong ka Synjuk ki Nongkhaï Maw Shyiap Crusher Pickup Auto-Truck Association, ha ka sngi Ba-ar kila leit ban khang ïa ki ar tylli ki kor tylliat maw jong ki ar tylli ki kompani shna surok, kiba pyntrei ïa ka surok Nongstoiñ – Wahkaji bad Nongstoiñ – Kyrshai.
Ka jingmih jong ki paidbah ban leit khang ïa ki kor tylliaw maw jong kitei ki kompani ka dei halor ka jingkynnoh ba kine ki ar tylli ki kompani kiba pyntrei ïa ka project surok ki la ïai bteng ban shalan bad die kylla ïa u mawria sha ki riew paidbah jong ka thaiñ, uba dei ban pyndonkam tang ha ka project shna surok.
Shuh shuh ha kane ka sngi na ka liang katei ka kynhun hadien ba ki la leit ban khang noh ïa kitei ki ar tylli ki kor tylliat maw jong kitei ki kompani ki la leit ruh ban ïakynduh ïa u DC ban kyntu ba un shimkhia ban tuklar lem.
Ki nongkitkam jong ka Association ba kynthup ïa u Bah Mawkordor Kharsyiemlieh, Secretary haba kren sha ki lad pathai khubor u la ong, hadien ka jingleit jurip ka Association kala khang noh ïa kitei ki kor tylliat maw jong kitei ki kompani ïa kaba ka Association kala lap ba ki la shallan beaiñ ïa u maw sha ki riew paidbah kiba hap ha West Khasi Hills bad sha kiwei pat.
U la ong ruh ba ka jingshalan bad die ka jong ki ïa u maw sha ki riew paidbah ka pynduhnong ïa ki nongkhaïi maw, ki nongbylla shoh maw hapoh ka thaiñ, bad u la ong ruh ba kane kam dei shuh ka jingkyrpad hynrei ka dei ka jingmaham ba kim dei ban leh kumne namar naduh mynshuwa na ka liang ka Association kala dep ban leit kyrpad.
Shuh shuh u la ïathuh ruh ba ha ka jingïakynduh bad u DC, u la pynpaw ban ong ban ai da ka jingthoh khnang ba u DC un ïoh ban shim kam.
