Pynkhreh thied jaka ka Sorkar na ka bynta ka surok 4-lane High Speed Corridor

Khliehriat, Nailar 05

Ka Sorkar Jylla lyngba ka National Highways and Infrastructure Development Corporation Limited (NHIDCL) ka la pynkhreh na ka bynta ban thied jaka na ka bynta ka surok 4-lane Greenfield Alignment (High-Speed Corridor) ka  ban ïaid lyngba ïa ki 34 tylli ki shnong kiba hap hapoh East Jaiñtia Hills District.

Kine ki shnong ki kynthup ïa ka Tuber Shohshrieh, Tuber Kmai Shnong, Wapung Shnong, Wapung Skur, Lad Rymbai Datsimpein, Mookhep, Lad Rymbai B, Dkhiah West, Dkhiah East, Khliehriat East, Rymbai, Umsatai, Pynurkba, Bataw, Lakadong Umlatdoh, Lakadong Ummat, Lama, Borghat, Natbor, Dein Satlang, Kwator, Demlakang, Ladwahwapung, Hingaria, Huroi, Lahalein, Lejri, Borsora, Kuliang, Umkiang, Lum Phyllut, Dona Skur, Dona Umbluh bad Ratacherra. 

Haba pyntip ïa kane ha ka 5 tarik Nailar, u District Collector ka East Jaiñtia Hills District u la ong, “La pyntip sha ki paidbah ba kino kino ki jingtei kiba thymmai ne ki kam pynroi ha ki jaka ba la ithuh na ka bynta ka jingshna ïa kane ka surok 4 lane Greenfield Alignment (High Speed Corridor) ki dei ban ïoh shwa ïa ka jingbit na ka ophis u Deputy Commissioner.”

“Nalor kata, la kdew shai ba kino kino ki jingtei ba khlem ïoh jingbit la ki dei kiba shipor ne kiba neh shirta kiba la pynïeng ha ki jaka ba la tyrwa pynïaid ïa ka surok hadien ba la pynmih ïa kane ka jingpynbna yn ym shim shuh kum kiba dei hok ban dang ïoh ïa kano kano ka jingsiew bai lutksan ha ka por ba thied ïa ka jaka ne pyntreikam ïa ka project. Kane ka treikam lang ïa ki jingtei jong ki riew shimet ne ki jingtei na ka bynta ki kam khaïi pateng,” u la ong.

U District Collector u la ong ruh ba kane ka hukum kaba u la pynmih ka la sdang treikam mardor naduh ba la pynmih ïa ka.