Shillong, Nailar 05
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka na kylleng ki jaka, ka jingshah prong tuh jong ki ïing bad kiwei ki kam tuh.
Ha ka khubor kaba la ïoh lum na ki pulit lyngba ka website, la ong ba u Copperfield Lyngdoh Kynshi u la ai ka jingujor ba ha ka por shiteng miet jong ka 2 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AB-9020 na ka phyllaw jong ka jaka sah ka jong u, kaba don ha Mawlai Mawdatbaki Umparmaw, Shillong.
Kumjuh ruh ka samla A Mawthoh ka la ujor ba hapdeng ka miet jong ka 1 bad 2 tarik mynta u bnai, ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML05-X-8033 na Umkdait Nongmensong, Shillong.
U Prashant Soni ruh u la ai ka jingujor ha ka 3 tarik mynta u bnai, ba ki runar bym lah ban ithuh, ki la tuh ïa ka arshaka ka jong u, kaba don ïa u registration number DL11-H-2358 na ka jaka najan jong ka ISBT Mawiong, Shillong By-Pass.
Na ka liang jong u Shanskhemlang Syiemlieh ruh u la ai ka jingujor sha ki pulit ba ha ka miet jong ka 2 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AD-0439 na ka thaiñ Umpling, Shillong.
Ha kawei pat ka khubor, u Ferdinand Mynthlu u la ai ka jingujor sha ki pulit ba ha ka janmiet jong ka 3 tarik mynta u bnai, ki runar bym lah ban ithuh, ki la prong tuh hapoh ka ïing kaba u sah wai ha Pohkseh, Shillong bad ban rah tuh ïa ka iPad ka jong u, kaba shongdor kumba T.10,000/-.
Kumjuh ruh na ka liang jong u Shakeel Ahmed u la ai ka jingujor sha ki pulit ba ha ka 2 tarik mynta u bnai, uwei u runar bym lah ban ithuh, u la knieh ïa ka bek ka jong u, kaba don ïa ka pisa T.1 lak, katba u dang don ha lynti na Ïewduh ban leit sha Jhalupara, Shillong.
Na ka liang jong u Robiclesansman Lyngdoh Kynshi u la ai ka jingujor sha ki pulit ba ha ka miet jong ka 31 tarik u bnai ba la lah, ki runar bym lah ban ithuh, ki la tuh ïa u battery ba shongdor kumba T.14,000/- jong kawei ka kor puh shilum (JCB) na Pyndengumiong Dong Langstiehrim ha Eastern West Khasi Hills.
