Shillong, Nailar 05
U Myntri Rangbah ka Jylla, u Conrad K. Sangma ha ka Sngi Ba-ar u la pynbna ba ka Sorkar ka la mang T.240 klur ha kine ki lai snem ban wan hapoh jong ka ‘Floriculture Mission 1.0’, da ka jingthmu ban pynkylla ïa ka Jylla sha ka jaka pdeng jong ka jingrep syntiew ba pawkhmat ka Thaiñ Shatei Lam Mihngi bad ka ri baroh kawei.
Haba kren ha ka jingleit jngoh ïa ka shnong Mawkriah ha East Khasi Hills, ha ryngkat ka jingsynran ka Myntri ka tnad ka rep ka riang, Dr. Ampareen Lyngdoh bad MLA, Bah Ronnie Lyngdoh, u Myntri Rangbah u la kdew ba ka thong jong ka ‘Mission’ ka long ban pynkylla ïa ka jingrep syntiew sha ka lad kamai kaba don dor, kaba lah ban shah ïa ka jinglong-jingman ka suiñbneng, bad ka lynti kaba lah ban pynneh-pynsah.
Ka ‘Mission’ kaba la sdang ha u bnai Lber, 2024, ka thmu ban ai jingmyntoi ïa palat 3,000 ngut ki nongrep da kaba ai ïa ka song jingïarap kaba T.7 lak kaba kynthup ïa ki mar rep, ki jingtei, bad ka jingai jinghikai. Haduh mynta, jan kumba 500 ngut ki nongrep ki la dep ban ïoh ïa ki jingmyntoi na kane ka prokram.
“Kane ka dei ka jingbei tyngka kaba heh tam kaba kano-kano ka Sorkar ka la leh ha ka rep syntiew ha Meghalaya”, la ong u Myntri Rangbah.
“Ngi khmih lynti ïa ka jingmihkaba T.600 klur lyngba kane ka ‘Mission’ ha kine ki khyndiat snem ban wan,” u la ong.
Kane ka skhim kan pynleit jingmut ha ka ban rep ïa ki syntiew kiba rem dor kum ki syntiew ‘Orchid’ (Dendrobium, Cymbidium, Vanda, bad Phalaenopsis) bad ‘Oriental Lilium’, kiba don ka jingdawa kaba jur ha ri India bad ha ki ïew ki hat jong ka pyrthei.
Ka jinglong-jingman suiñbneng ba kyrpang jong ka Jylla-ka ïahap bha na bynta kine ki jait jingthung.
Ban pyntikna ïa ka jingbha bad ka jinglah ban pynneh-pynsah, ka Sorkar ka la kynthup ïa 2 tylli ki ‘Service Provider’ ba tbit-ka ‘Darjeeling Gardens’ bad ka ‘North Bengal Floritech’- ki ban ai ïa ka jingstad ba bniah, ki tiar thung kiba paka, ka jingkyrshan ïa ki jingtei, bad ka jingpyntikna ïa ka jingpynïasoh sha ki ïew ki hat lyngba ka jingïateh ‘Buyback Agreement’ kaba lai snem.
“Ïa ki song syntiew kiba ïadei bad kata ka thaiñ la pynwandur da kaba pyndonkam ïa ki buit rep science,” ong u Myntri Rangbah.
“Ngi dang tei ïa ki bor ba kynja mariang jong ka Jylla bad ngi dang thaw ïa ki buit thymmai ha ryngkat ki rukom treikam ba la pynbha,” u la ong.
Ka ‘Floriculture Mission’ ka dei ka bynta jong ka jingthmu rep kaba kham heh jong ka Jylla, kaba kynthup ïa ki prokram kiba jop kum ka ‘Lakadong Turmeric Mission’, ha kaba ka jingpynmih ka la kiew na ka 1,000 MT sha palat 20,000 MT, da ka jingai khublei ïa ka jingbei tyngka kaba la pynleit jingmut, ki jaka pyntreikam ba la ïalam da ki SHG, bad ki jingpynïasoh kiba khlaiñ ha ka liang ki ïew ki hat.
“Ka jingthmu jong ka Meghalaya ha ka rep ka riang ka shong nongrim ha ka ban pynithuh ïa ki jingkhlaiñ tynrai jong ngi bad ban kyntiew ïa ki,” u la ong da kaba bynrap, “Ngi thmu ban kyntiew arshah ïa ka jingïoh jong ki nongrep, ban pynïar ïa ki rukom kamai ha nongkyndong, bad ban pynlong ïa ka rep ka riang kum ka nongrim jong ka roi ka par kaba neh.”
Shuh shuh ban pyndap ïa ka jingdawa bad jingkyrshan ïa ka jingpynmih syntiew kaba nangroi, ka Sorkar ka thmu ban buh ïa ki jaka pynlang ba kyrpang bad ki ‘Logistic Hub’ ha kylleng ki jaka.
Kine ki jaka kin pyntikna ïa ka kit ka bah kaba biang por, ka jingpynneh-pynsah ïa ka jinglong jong ki syntiew, bad ka jinglah ban pynïoh ïa ka ïew ka hat na ka bynta ki nongrep.
Nalor kane, u Myntri Rangbah u la pynpaw ruh ba ïa ki sienjam kum ka ‘CM’s Farm Plus’, ‘CM-Assure’, bad kiwei kiwei la pynïasoh lang ban pynbiang ïa ka jingkyrshan ba pura sha ki nongrep ha kylleng ka Jylla.
