Nongstoiñ, Nailar 06
Ka jingdon ka mynsiem jong kano kano ka briew lane u briew ban kner ban ïarap lane ai sngewbha ïa kano kano bynta sha ki para briew lane sha ki kynhun bad ki tnat bapher bapher na ka bynta ka jingmyntoi ïa kiba bun balang, lehse kan kham niar ha kine ki sngi kiba mynta hynrei kane ka jingdon ka mynsiem kala long shisha ka nuksa kaba bha tam ïa ka imlang ka sahlang.
Kane ka khubor ka ïahap ruh bad ka Kong Phlosimai Langrin na ka shnong Maweit ha West Khasi Hills ha kaba ka Kong Phlosimai da ka mynsiem kaba sngur ha ka sngi Balang kala ai sngewbha haduh 4.56 akar ka jaka sha ka Sorkar lyngba ka tnat Pulit jong ka West Khasi Hills na ka bynta ban tei ïa ka Maweit Police Outpost kaba la dep ban buh jingmut.
Ha katei ka sngi, na ka liang ka Kong Phlosimai kala leit ban aiti ïa ka dulir jong katei ka jaka hakhmat u Superintendent of Police (SP) ka West Khasi Hills ha ka jingdonlang ruh u Bah G Thongni uba long dei u dkhot ka Executive Dorbar ka shnong Maweit bad ki bahaïing hasem. U SP ka West Khasi Hills u Bikram D Marak u la ong, “Ka jingai ba sbun ka dei ka jingpynshisha ïa ka jingïatreilang hapoh ka imlang sahlang.”
U la ong ruh ba ka jingsbun jong ka, ka long ka jingpynshisha bad jingpynskhem ba ka jingïatreilang ha ka imlang sahlang ka dei ka borbah ha ka ban ïarap ban pynskhem ïa ki aiñ ki kanun.
U Sordar ka shnong Maweit ha West Khasi Hills u ba dei ruh u khun jong ka Kong Phlosimai, u Bah Sirboss Langrin haba kren bad u nongthoh khubor u la ong, “I mei jong ngi i la ai sngewbha ïa katei ka jaka sha ka Sorkar lyngba ka tnat Pulit jong ka West Khasi Hills na ka bynta ka Maweit Police Outpost, kumta nga kyntu ïa ka Sorkar ba ka dei ban shimkhia ba la kumno kumno ka dei ban pynurlong noh ïa ka out post khnang ba kan long ka jingmyntoi bad ka jingpynsuk ïa ki paidbah jong ka thaiñ khamtam ha ka shongsuk shong shngaiñ.”
