Shillong, Nailar 06
U Myntri Rangbah ka Jylla, u Conrad K Sangma ha ka Sngi Balang u la bishar bniah halor ka jingpyntreikam ïa ka Meghalaya Health Insurance Scheme (MHIS) bad u la bthah ïa ka tnat ka koit ka khiah ban tohkit kyrkieh ïa ki daw tynrai kiba don ha lyndet jong ka jingïai pynslem ban siew ïa ki jingsiew bad ka jingkyntait ïa ki jingdawa bad ban shim ïa ki lad ki lynti ban pynbeit ïa ka jingtreikam jong kane ka skhim.
Ha kane ka jingïalang bishar bniah la don lang da ka Myntri ka tnat ka koit ka khiah, ka Kong Ampareen Lyngdoh bad ki heh ophisar ka tnat ka koit ka khiah.
Ha ka jingthoh jong u ha ka rynsan X, u Myntri Rangbah u la ong, “La bishar bniah ïa ka jingpyntreikam ïa ka Meghalaya Health Insurance Scheme (MHIS) ryngkat bad ka Myntri ka tnat ka koit ka khiah, ka Dr. @ampareenlyngdoh bad ki heh ophisar na ka tnat ka koit ka khiah. La bthah ïa ka tnat ban bishar bniah kyrkieh ïa ki daw kiba pynlong ïa ka jingpynslem ban siew bad ka jingkyntait ïa ki jingdawa, bad ban shim ïa ki lad ki lynti ban pynbeit khnang ban pynthikna ba ïa ka skhim la pyntreikam hok bad shai ban shakri ïa ka jingmyntoi jong uwei pa uwei u nongshong shnong jong ka Meghalaya.”
Ka MHIS ka dei shibynta jong ka jingpyrshang jong ka Jylla ban pynbha ïa ka jingai jingsumar bad ban ai jingïada ha ka liang ka pisa tyngka ïa ki nongshong shnong jong ka. Ka jingpyntreikam kaba paka ïa ka skhim ka long kaba kongsan bha ban pynthikna ba ki nongshong shnong kin ïoh ïa ka jingsumar kaba ki donkam khlem da ïakynduh ïa ka jingeh kaba khraw ha ka liang ka pisa tyngka.
