Shillong Nailar 06
Ka Synjuk ki Khlieh Nongsynshar Shnong (SKNS) jong ka Mawsynram C&RD Block ha ka jingsynrang lang ki seng bhalang bapher bapher jong ka thaiñ ha ka 06 tarik u Nailar 2025 ki la leit ban ïakynduh ïa u Myntri Rangbah ka Jylla u Conrad K Sangma ban dawa kyntiew kyrdan noh ïa ka Mawsynram C&RD Block sha ka Mawsynram Civil Sub-Division.
Haba kren sha ki lad pathai khubor U Chair-man ka Synjuk jong ki Khlieh Nongsynshar Shnong jong ka Maw-synram C&RD Block u Bah Hiamdor Rapsang u la ong ba kane ka jingdawa ka ïa ka Mawsynram Civil Sub-Division ka la neh naduh ki 20 snem ba la dep hynrei haduh kine ki sngi ym pat lah ban pynurlong eiei bad kumta ngi hap ban buddien bha ïa kane ka kam haduh ban da urlong.
U la ong ba lada ka sorkar ka kyntiew kyrdan noh sha ka Civil Sub-Division kan long ka jingmyntoi kaba khraw na ka bynta ki nongshong shnong ba sah ha katei ka thaiñ.
Kumjuh ruh u la ong ba namar ka Shillong ka la khapngiah kumta ka jingkyntiew sha ka Civil Sub-Division kan long ka jingmyntoi namar ki paidbah ka thaiñ kim donkam shuh ban wan sha Shillong lada la don ki jaka sumar, ki jaka pule bad ki ophis kiba biang.
“Namar ba ka jingphiah shnong ka dei tang ka lad kaba shisha ban pynïajan ïa ka jingsynshar bad ki paidbah bad namar ba ka Sorkar Meghalaya Democratic Alliance (MDA-02) kaba mynta hapoh ka jingïalam jong u Conrad K Sangma ka la pynpaw ba ka dei ka sorkar paidbah kumta, ngi don ka jingngeit kaba skhem ba ka sorkar jong u Conrad kan sngap ïa ka jingdawa jong ki paidbah” la bynrap u Bah Hiamdor Rapsang.
U Bah Hiamdor Rapsang u la kdew ruh ba ki paidbah ki la ai katto katne ki daw ban pynshisha ïa ka jingdawa, kynthup ïa ka rta jong ka block (ba la seng ha u snem 1962), ka jaka jong ka, ka jingbun briew (kumba 65,000 ngut). Ka block ka ai jingshakri ïa palat 144 tylli ki shnong.
U Bah Hiamdor Rapsang u la ïathuh ba kane ka jingïakynduh bad u Myntri Rangbah ka long kaba sngewtynnad ha kaba ki la ïoh ïa ka jubab kaba shai na u bad u la kular ban sa shimkhia bad peitbniah ïa kane ka kam.
