Shillong, Nailar 06
Ka India kan long kawei na ki hynñiew tylli ki ri kiba pynlong ïa ka AFC U-17 Asian Cup Saudi Arabia 2026 Qualifiers, kaba la thmu ban long naduh ka 22 haduh ka 30 tarik u Naiwieng mynta u snem.
Ka Stadium kaba ha Ahmedabad kan long ka jaka ban pynlong ïa baroh ki jingïalehkai. Ka jingpynïakap na ka bynta kane ka ‘qualifier’ kan long ha ka 7 tarik mynta u bnai.
Ïa ki 38 tylli ki ri kiba ïashim bynta ha kane ka lympung ïaknieh yn phiah ha ki hynñiew tylli ki group, kaba kynthup ïa lai tylli ki group kiba don hynriew tylli ki kynhun bad saw ki group kiba don san tylli ki kynhun. Ki kynhun kiba jop ha kawei pa kawei ka group kin ïoh rung sha ka AFC U-17 Asian Cup Saudi Arabia 2026, da kaba ïasoh lang bad khyndai tylli ki kynhun ka AFC kiba ïashim bynta ha ka FIFA U-17 World Cup Qatar 2025, kiba la dep ban rung sha kane ka lympung.
U President ka AIFF u Kalyan Chaubey u la ong, “Ka long ka jingsngew sarong ïa ka India ban long kum kawei na ki nongpynïaid ïa ka AFC U-17 Asian Cup Saudi Arabia 2026 Qualifiers, bad nga sngewkmen ban ïohi ïa ka Ahmedabad kan pdiang ïa kane ka lympung. Kane ka pyni ïa ka jinglah jong ka ban pynlong ïa kane ka lympung ïalehkai bar ri. Nga kitbok kitrwiang ïa ki khynnah shynrang jong ngi ba kin ïoh ia ka jingjop, bad kyrmen skhem ba kin ïoh rung sha ka AFC U-17 Asian Cup, kaba long kum ka khyrdop sha ka FIFA U-17 World Cup.”
Na ka liang u Myntri ka tnat ïalehkai jong ka Gujarat u Harsh Sanghavi u la ong ba ka long ka jingsarong na ka bynta ka phutbol ha India bad Gujarat. “Ka long ka kabu ïa ka Jylla ban pyni ïa ka jingïeid jong ka ïa ka jingïalehkai, ka jingpdiang sngewbha jong ka kaba long ha ka kyrdan jong ka pyrthei. Ka jingïoh ban pynlong ïa kane ka jingïalehkai ka la buh ïa ka Ahmedabad ha ka map phutbol jong ka dewbah Asia.”
Ki 38 tylli ki kynhun ki ban shim bynta ha kane ka lympung ïaknieh la phiah ha ki hynriew tylli ki pot (group). Ka China PR, Vietnam, Thailand, Myanmar, Kyrgyz Republic bad ka Jordan ki la long kiwei pat ki hynriew tylli ki ri kiba la don ha kajuh ka group bad ka India.
Ki jingpynïakap ïa ki kynhun ha ki Pot na ka bynta ka AFC U-17 Asian Cup Saudi Arabia 2026 Qualifiers:
Pot 1: Australia, Yemen, IR Iran, Oman, Thailand
Pot 2: Afghanistan, Malaysia, Iraq, Bangladesh, Laos, Kuwait
Pot 3: Singapore, Bahrain, Philippines, Turkmenistan, Palestine
Pot 4: Syria, Mongolia, Cambodia, Hong Kong, Chinese Taipei, Brunei Darussalam
Pot 5: Nepal, Northern Mariana Islands, Guam, Maldives, Timor-Leste, Lebanon
Pot 6: Macau, Sri Lanka, Pakistan
Host Pot: China PR, Vietnam, Thailand, India, Myanmar, Kyrgyz Republic, Jordan.
