Shillong Nailar 06
Ki Dkhot ka Provisional Town Vending Committee (PTVC) ha ka 06 Tarik u Nailar 2025 ki la leit sha ka jingïalang ba la khot da u Chief Executive Officer (CEO) ka Shillong Municipal Board (SMB) u P.K.Boro kaba la long ha Urban Affairs.
Ki Dkhot ka PTVC ba la wan ha kane ka jingïalang ki kynthup ïa ka Kong Angela Rngad bad Kong Biolin Pyrtuh kiba dei na ka Meghalaya Greater Shillong Progressive Hawkers Association (MGSPHA) bad Ka Kong Tell me Nongbri bad u Bah E.Chen na ka Shillong Road Side Hawkers Association, nalor u Samla Rewben Najiar na ka seng KSU u ba dei u Dkhot ha kane ka PTVC.
Ha kane ka jingïalang ba la khot da u CEO ïa ki Dkhot ka Provisional Town Vending Commi-ttee (PTVC) kadei ban ïakren halor ka jingbym ïoh lut ïa ka Certificate Of Vending (COV) hadien ba na ka liang kiba shongdie madan ha Khyndai Lad ki la pynpaw ïa ka jingpyrshah jur ïa ka Ophis ka Municipal bym shym la ai lut ïa ka COV.
Haba pyrshang ban ïakren bad ka Kong Angela ka nongaibuit jong ka seng ki nongdie madan hapoh ka shatri jong ka Meghalaya Greater Shillong Progressive Hawkers Association (MGSPHA) kam shem la kwah ban ïakren bad ki lad pathai khubor kaba pyni ba kim pat hun satia ïa katei ka jingïalang ba la long hynne ka sngi.
Na ka liang ka Kong Tell me pat ka nongïalam jong ka Shillong Roadside Hawkers Association (SRHA) ka la pynpaw ïa ka jingsngew tynnad shibun halor katei ka jingïalang ba la khot u CEO bad na ka liang jong u ruh u la ong ban sa khot biang ïa ka jingïalang.
U Bah E.chen u dkhot ka PTVC hadien ba la wai ka jingïalang u la ïathuh ba mynta ka rai ba mih na kane ka jingïakynduh lang kalong ban leh ïa kaba ïasuk lang baroh kiba shongdie madan.
U la ïathuh ruh ba kito ki bym pat ïoh ïa ka COV kin dangïai ïakren bad na ka liang u CEO ka SMB un sa khot biang ïa ka PTVC ha kine ki sngi ban wan.
“Kiba shong die jingdie ha Khyndailad ki dangdon bun ki bym pat ïoh ïa ka COV” la ïathuh u Bah E.Chen.
Nalor kata u la pynpaw ruh ba na ka liang jong ki, ki la hun ïa kane ka jingïalang namar ka la ïaid beit ïaid ryntih.
