Shillong, Nailar 06
Ka jingmih ki khubor jingpynbna ba uwei na ki nongrwai bapawnam ka pyrthei, u Bruno Mars un sa wan shapoh ka Ri India kata ha Guwahati ban pynbyrngia ïa ki paidbah kiba sngewtynnad bad ieid ïa ki jingrwai bad jingtem jong u, ka la pynlong ïa kiba bun ki paidbah kiba ieid jingrwai na kylleng ka Ri India bad kumjuh ruh napoh ka Jylla Meghalaya ba kin kyndeh mynsiem ban leit sha katei ka ‘concert’ bad ban thied noh kham kloi ïa ki ticket hashwa ba kin lut noh.
Hynrei katkum ki tyllong khubor la ïathuh ba ha ka jingwad jingtip kaba bniah bha halor kane, kane baroh ka dei tang ka khubor thok ba la leh da ki briew kiba kam ïalade ba ki dei ki nongpynbeit ïa ka jingwan une u nongrwai bapawnam ka pyrthei kaba long tang kum ka lad ban lute ïa ka pisa jong ki paidbah.
Katkum ki tyllong khubor, la ïathuh ruh ba na ka liang ki nongpynïaid jong ka tamasa Cherry Blossom Festival ha Shillong kiba ju don ka jingïadei kaba ïajan bad ki shnat treikam bapher-bapher ban wanrah ïa ki nongrwai bad nongtem, ki la pynthikna ba kane ka dei ka khubor lamler bad kaba thmu ban lute ïa ka pisa jong ki paidbah da kaba pynbiej ban wanrah ïa une u nongrwai.
