Tura, Nailar 06
Hadien saw sngi jong ka jingwad kaba jur kaba la kynthup naduh ki pulit ka district, ki Fire and Emergency Team, State Disaster Relief Force (SDRF) bad kumjuh ruh ki trai shnong, la ïoh ban sei noh ïa ka met ïap jong u Teseng M Sangma ha ka sngi Balang na ka wah Ganol kaba don sha khapsor jong ka nongbah Tura.
Lah ban pynkynmaw ba u Teseng M Sangma uba dei u ophisar ka tnat Agriculture ka South West Garo Hills, u la shah rong noh ha ka umsaw kaba la jia ha ka sngi U Blei ha ka por ba u la leit bad ki bahaïing ban leit bam khana. U Teseng u dei uba bat kum u Sub Divisional Agriculture Officer (SDAO) hapoh ka district jong ka South West Garo Hills (SWGH).
U Teseng u la pyrshang ban jam sha shiliang ka wah wat hapdeng ka jingheh ka um bad dei ha kane ka por ba u la shah rong ha ka umsaw. Ka jingtuid ka um ha ka wah Ganol ka la kiew bha namar ka jingbteng jong ka jinghap slap bad kaba la wanrah jingeh ruh shibun ha kaba wad ïa u.
Ïa ka met jong u Teseng la lap hadien ba ka la sahkut hapdeng ki lai tylli ki maw kiba heh ha katei ka wah, hajan jong ka Intu Wari ha ka por kumba 12:10 mynsngi.
Namar ka jingheh jong ka um, ka la buh jingeh shi katdei eh ïa ki nongsei bad ka la shim por haduh kumba 5 kynta ban ïoh sei shabar ïa ka met.
Ha kawei pat ka liang, ki bor pynïaid district jong ka South West Garo Hills ki la pynpaw ïa ka jingsngewsih bad ban phah ruh ïa ka jingsngewlem halor ka jingkhlad noh jong u Teseng.
Une u ophisar u la ieh noh shadien ïa ka kurim, kaba trei lang ha kajuh ka tnat kum ka Assistant Director bad ïa ar ngut ki khun shynrang.
