Guwahati, Nailar 06
Ka North East Students’ Organisation (NESO) ka la dawa ïa ka jingpyntreikam ïa ka National Register of Citizens (NRC) ha baroh ki Jylla jong ka Thaiñ Shatei Lam Mihngi.
Haba kren sha ki lad pathai khubor hadien ka jingïalang ha ka Sngi Balang, ki nongïalam ba rangbah jong ka NESO, ba kynthup ïa u nongai buit, u Samujjal Bhattacharyya bad u Convenor, u Utpal Sarma, ki la ban biang halor ka jingdonkam ban pynshisha biang ïa ka NRC ha Assam.
Ki la pynpaw ïa ka jingsngewkhia halor ka jingbteng ka jingwan rung kyrthep ki nongwan buhai shnong be-aiñ, kiba kynnoh ba ki la skud jaka ha ki jaka khlaw – ka seng ka la ai ka jingkyrshan ïa ka Sorkar Assam halor ki jingkyndang kiba dang ïaid shakhmat.
U Sarma u la ong ba ka jingpynithuh bad ka jingphah noh ïa ki bar jylla (be-aiñ) ka dei ban long ka mat ka ban hap buh hakhmat eh ha kylleng ka thaiñ.
“Ïa ka rukom treikam jong ka NRC dei ban pynïar sha baroh kawei ka Thaiñ Shatei Lam Mihngi,” u la ong bad bynrap ba ka jingkhmih bniah kaba thymmai ha Assam ka long kaba donkam ban pyntikna ïa ka jingbit jingbiang bad jinglong hok jong ki kot ki sla.
Na ka liang u Bhattacharyya, u la maham ïa ka jingma kaba lah ban mih na ka jingwan buhai shnong kaba khlem ka jingtehlakam.
“Ka jingeh jong ki bar jylla ba wan rung be-aiñ ka dang sah khlem da lah ban pynbeit. Ka khappud India-Bangladesh ka dang ïai bteng ban long kum ka khyrdop na bynta ki nongwan rung tuh, kynthup ïa ki kynhun kiba bud ryntih ïa ki nongrim treikam. Ka jingbym lah jong ka Sorkar ban lap, pyndam, bad phah noh ïa kum kine ki jaidbynriew ka long ka jingbym shinkhia kaba khraw ïa ka kamram,” u la ong.
U la kdew ruh ïa ka Tripura kum ka nuksa da kaba kam ba ka don ka jinghiar kaba jur ha ka jingbun briew haba phai sha ki trai-ri trai-muluk.
“Na ki 40 lak ngut ki briew ha Tripura, tang 3 lak ngut ki dei ki trai-ri trai-muluk. Kane ka jingkylla ha ka jingbun briew ka long kaba sngew shyrkhei”, la ong u Bhattacharyya.
Haba ther ïa ki Sorkar kiba bud iwei-hadien-iwei namar ka jingbym leh eiei jong ki, u la bynrap, “Ïa ka ‘Assam Accord’ la soi da ki phew snem mynshuwa, hynrei kiba bun ki kyndon jong ka ki dang sah kumto khlem da pyntreikam. Ym tang ka Assam, ka Thaiñ Shatei Lam Mihngi baroh kawei ka la shah ktah namar kata kaba ki ong ka jingïadei paralok bad ka Bangladesh.”
U la kynthoh ruh ïa ka Sorkar Jylla ba la ïalam da ka BJP halor kaei kaba u ñiew – ka jingbym bud ryntih ïa ki kam ba kham hashuwa jong ka National Investigation Agency (NIA) pyrshah ïa ki briew kiba suba dei ki nongwan rung tuh.
“La kem, hynrei kam shym la don ka jingbuddien kaba neh. Balei ka Sorkar ka sngap jar?” u la kylli.
Haba pynkynmaw biang ïa ka jingdawa na bynta ka jingtehlakam ba kham pyrkhing ïa ki khappud, u Bhattacharyya u la ong, “Ïa ka khappud jong ka India bad Bangladesh dei ban khang noh da kaba pynkhreh ban ïakhun ïa ka thma. Ka NESO kan ym ailad ïa ka Thaiñ Shatei Lam Mihngi ban kylla long sa kawei pat ka Kashmir.”
Ha kajuh ka por, u la maham ba ka jingwan rung kyrthep ba khlem tehlakam jong ki nongwan buhai shnong be-aiñ ym tang ba ka pynthut ïa ka jinglong-jingman jong ka Thaiñ Shatei Lam Mihngi hynrei ka buh jingma ruh ïa ka jingshngaiñ jong ka ri.
Ha kawei ka liang, u Sarma u la ban jur halor ka jingdonkam ban bteng ïa ki kam, pyrshah ïa ki nongwan skud jaka.
“Ym lah ban pdiang ïa kano-kano ka jingwan skud jaka ha ki jaka khlaw la ka long ha kano-kano ka rukom. Ki jingkyndang ki dei ban ïai bteng khlem artatien ha baroh ki thaiñ ba shah ktah,” u la ong.
Nalor kine, la ïakren ruh halor ka jingpynithuh ba mardor bad ka jingphah noh ïa nongwan buhai shnong (be-aiñ) kiba na Bangladesh, ka jingpyllait ïa ka Thaiñ Shatei Lam Mihngi na ka Citizenship Amendment Act (CAA) bad kiwei.
