Na ka sorkar leit dawa ka KHADC ban pyllait noh ïa ka bhah khajna ba kadei ban ïoh

Shillong Nailar 06

Ka Khasi Hills Autonomous District Council (KHADC) ha ka 06 tarik u Nailar 2025 kala dawa naka Sorkar Jylla ban pyllait noh ïa ka bhah khajna ba ka District Council kadei ban ïoh.

Ia kane ka jingdawa ka KHADC ka la pynsngew ha ka jingïa kynduh ïa u Symbud Myntri Rangbah ka Jylla ba khmih ïa ka tnad District Council Affairs (DCA) u Bah Prestone Tynsong.

Haba kren sha ki lad pathai khubor na ka liang u Chief Executive Member (CEM) ka Khasi Hills Autonomous District Council u Bah Shemborlang Rynjah u la ong ba ka Sorkar Jylla lyngba ka DCA ka la dep ban pyllait ïa ka bhah khajna sha kiwei ki District Council hynrei haduh mynta ka KHADC kam pat ïoh ïa ka bhah ba dei ban ïoh.

“Naduh ki bnai ba la dep ngi la buddien halor kane lyngba ki shithi hynrei haduh mynta ngim pat ïoh ktien halor ka bhah ba ka KHADC kadei ban ïoh namar kata ngi la sngew donkam ban wan kynduh markhmat ïa u Symbud Myntri Rangbah ba khmih ïa ka tnad DCA” la ong u Bah Shemborlang.

U CEM u la ïathuh ruh ba ha ka jingïalang Symbud Myntri Rangbah ba khmih ïa ka tnad DCA, la ïakren ruh halor ka Research ba ka District Council kadei ban wad bniah shuh shuh ïa ka jinglong jingman jong ka Jaidbynriew.

U la ong ba ka KHADC kala kyntu ïa ka Sorkar lyngba u Symbud Myntri Rangbah ban kyrshan ïa ka District Council ha ba ïadei bad ka jingwad (Research).

Haba kylli u CEM u la ïathuh ba na ka liang u Symbud Myntri Rangbah u khlem kular eiei hynrei u la bthah ïa u Ophisar ban leh ïa ka ba donkam.