Shillong, Nailar 06
U Son Heung-min u la pyndep ïa ka jingleit ïasoh sha ka Los Angeles FC, da kaba soi ïa ka kontrak bad kane ka kynhun ïalehkai Major League Soccer (MLS) ha ka sngi Ba-ar.
Une u rangïalehkai shakhmat ba la 33 snem ka rta na South Korea u la pynkut noh ïa ki shiphew snem ki jingïalehkai ha ka Tottenham Hotspur, kaba long ka jingkut noh ka jingïalehkai jong u ha North London bad ban sdang ïa ka jingïaid lynti kaba thymmai ha ka bynta kaba shathie jong ka California.
Kat kum ki khubor la ong ba u Son u la don ha BMO Stadium na ka bynta ka jingïalehkai Leagues Cup jong ka LAFC. Na ka liang ka klob ka la khmih lynti ba kan sa pynithuh ïa u ha ka jingïalang bad ki lad pathai khubor. La ong ba ka LAFC ka la soi ïa utei u rangïalehkai ha ka jingsiew kaba $20 million.
Ha ka por ba u dangdon ha ka Spurs, u Son u la kylla long uba la shah phaikhmat ha ki nongkyrshan bad uwei na ki khlur ïalehkai ba paw ha ka Premier League, da kaba u la thep 173 kol ha ki 454 sien ïakhun. Ka jingmih noh jong u, ka long da ka jingsngewsih ha Seoul, ha ka taïew ba la lah, ha kaba u la ïoh ïa ka jingïaroh na ki 65,000 ngut ki nongkyrshan, ha ka por ba ka Tottenham ka ïakhun pyrshah ïa ka Newcastle.
Ka Los Angeles ka dei ka jaka kaba don dak bad kaba donkam bha na ka bynta u Son. Ka ïing jong ki nong Korea kiba bun tam shabar jong ka Korea, kane ka nongbah ka ai ka rynsan kaba paka ïa u Son ban pynïar ïa ka jingïalehkai jong u shabar ka madan, kumba leh ïa u Shohei Ohtani bad ka LA Dodgers ha ka Major League Baseball.
Te kumta ka jingleit ïasoh u Son ka long ban ïatylli lang kawei bad u kapten barim jong ka Spurs, u Hugo Lloris, uba long mynta u nongapkol jong ka LAFC. Mynta ka LAFC ka la don ha ka kyrdan kaba hynriew ha ka Western Conference. La khmih lynti ba ka jingwan jong u Son kan pynkhlaiñ ïa ka kynhun.
