Shillong, Nailar 06
Ka kam ïalehkai ka dei kawei na kiba donkam bha ha kane ka juk ba mynta, na ka liang ka Seng Khasi Secondary School Maw-phlang ka la shim ïa ka sien jam ban ai jinghikai ïa ki khynnah skul ha ka jingïalehkai kickboxing na ka bynta ki khynnah kynthei bad shynrang.
U samla Royalson Lapang uba long u samla uba ai jinghikai ïa ki khynnah skul ka Seng Khasi Secondary School, u la pynpaw ha u nongthoh khubor ba ka thong ba hakhmat eh jong ka jinghikai ïa ki khynnah skul kynthei bad shynrang ka dei ba kin lait na kaba pynlut por ha ki kam ki bym pynmyntoi.
U la ong ba u sngew tynnad ïa kane ka jingïa -lehkai Kickboxing, kane ka jingïalehkai kan long ka jingmyntoi ha ka koit ka khiah. U la ïathuh ruh ba ka skul ka la pynkhreh ban ïashim bynta ha ka 1st State Level Kickboxing Championship 2025 ka ban long ha u Nailur. Te kumta ki khynnah ki la trei shitom bad ki la pynkhreh ban mih shakhmat. Kumta u la khot ruh ïa kiwei ki skul bad ki synjuk ïalehkai ba kin wan ban ïashim bynta ha katei ka lympung ïalehkai.
Ka nonghikai jong ka skul Seng Khasi Secon-dary School Mawphlang ka Kong Bilinda Lyngdoh ka la ong ba kaba ktih jingmut ïa ki nongpynïaid skul bad ban wat lad wat lynti ban wanrah ïa ka Kickboxing ha ka skul ka long ba ki ïohi ba ka don kam ïa ka ha kane ka juk ba mynta.
Ka la ong ba ki khynnah ha kane ka juk mynta ym tang ba kin pule ïa ka kot, hynrei ki donkam ruh ban pylleit jingmut ïa ki kam ïalehkai, bad lyngba ka kickboxing kin lah ban pylleit jingmut, ban burom ïalade, bad ban long kiba shlur. Ka la ong ruh ba lyngba ka Kickboxing ki khynnah kin lah ban ïada ïalade khamtam ha kane ka juk ba mynta kaba ka shongsuk shnongsaiñ kam don shuh.
Shuh shuh na ka liang kane ka nonghikai ka la kyntu ïa ki kmie ki kpa ban phah ïa ki khun jong ki ban ïashim bynta ha kine ki jingïalehkai ka ban dei ka jingmyntoi ïa ki khun ki kti jong ki, ha kiba bun ki liang.
