Shillong Nailar 06
Ka ïingbishar Meghalaya High Court kala pynpaw ïa ka jingsngewhun halor ki sienjam bala shim da ka Sorkar Jylla ban leh eiei halor ki jingeh ba mih na ki ksew surok ha ka jylla.
Ka Division Bench kaba kynthup ïa u Chief Justice IP Mukerji bad u Justice W Diengdoh ha ka hukum kaba la pynmih ha ka sngi Balang hadien ka jingtian bishar ïa ka PIL kala ong, “Ngi sngewkmen ban tip na ka kaiphod kaba la aiti ha ka ïingbishar mynta ka sngi ba la shim ïa ki sienjam da ka Sorkar Jylla ha kaba ïadei bad ka jingeh kaba pynmih da ki ksew surok”.
Ïa ki committee hapoh ka Rule 4 jong ka Animal Birth Control (Dogs) Rules, 2001 la dep ban thaw ha baroh ki District kaba kynthup ïa ki ar tylli ki District ka South Garo Hills bad ka West Jaiñtia Hills.
Ka ïingbishar kala pyntip “Ka la paw shuh shuh na ka kaiphod bad na ka jingpynpaw u Additional Advocate General ba ka Sorkar kala pynkhreh ban pynlong ïa ki jingpynsngewthuh paidbah ne Awareness Camp, ban ai dawai tika ïa ki ksew surok ban lait na ka jingpang Rabies, ban ai dawai ïa ki ksew kynthei ba kin ym lah ban kha khun bad ban buh ïa ki ha ki jaka sah kat kaba lah ban pynïakhlad ïa ki na ki briew ka dei kaba la shim bad ka jingrejistar ïa ki ksew kiba ri ha ïing ruh kala ïaid shakhmat.
Ka ïingbishar hadien ba kala tian bishar ïa kane ka kam, kala hukum ban pynthikna ba dei ban pyntreikam pura ïa ka Prevention of Cruelty to Animals Act, 1960 bad ïa ka Animal Birth Control (Dogs) Rules, 2001.
U nongmudui u Kaustav Paul, ula ïoh ïa ka lad ban file ïa ka affidavit halor ka kaiphod jong ka Sorkar hapoh ka 25 tarik u Nailar 2025.
Ïa kane ka PIL yn sa shong tian bishar biang ha ka 28 tarik u Nailar 2025 ban pynkut noh hadien ba la dep shong bishar ïa ka kaiphod jong ka Sorkar bad ïa ka affidavit ka ban aiti da u nongmudui.
