Khliehriat Nailar 06
Ka Kur Sumer Pyllun Khasi Jaiñtia ka pynpaw ka jingsngewsih halor ka jingshah thombor kawei ka longkmie, ka Kong Inmon Sumer ha la u jong u kurim jong ka, u Bah Kmen Pohthmi ha kaba u la pom ïa ka da ka wait haduh ban da dkhut ka kti ka diang jong ka.
Ka Kong Inmon Sumer ka dei kaba shong ba sah ha ka Shnong Krang Pamtadong kaba hap hapoh ka Amlarem Civil Sub-Division, West Jaiñtia Hills District.
Ha u kyrwoh, ka Kur Sumer ka pynpaw ka jingsngewkhia bad sngewsih jur halor ka jingshah thombor katei ka longkmie bad ka pynrem jur ruh ïa u kurim jong ka, uba la thombor ïa ka bad ong ruh ba kane ka jingleh jong u ka long ba u la thmu ban shim syndon ïa ka jingim jong ka kurim jong u.
Na ka liang ka Kur Pyllun Sumer Khasi, Jaiñtia ka kyrpad jur ïa ka bor jong ka aiñ ban shimkhia bad ban pynshitom katkum ka aiñ ïa u Kmen Pohthmi uba thmu ban shim wat ïa ka jingim jong ka kurim ka jong u.
