Jowai, Nailar 06
Ka lympung ïalehkai Super Division Football Tournament (Kelsiroy Pala Memorial) ba la pynïaid da ka Thadlaskeiñ Sports Association (TSA) ka la sdang ha ka sngi Balang ha Wahïajer Multi Sports Complex ha kaba ki la don 10 tylli ki kynhun ba ïashim bynta ha kane ka lympung.
Ïa kane ka lympung la plie da u MDC ka Wahïajer u Bah Reformimgson Lamare ha ka jingïadonlang ki nongïalam bad dkhot nongkitkam ka TSA kynthup ïa u President u Bah Kmen Shylla, u General Secretary Bah E. Lyngdoh nalor kiwei pat.
Ha kane ka sngi sdang ïa kane ka lympungjong, ka Nongkhrohrim ka la pynliem noh ïa ka Wahïajer SC da 1-0 kol bad kane ka la wan urlong lyngba u Haman Myrboh ha ka minit kaba 17.
Haba phai sha ka jingïalehkai 2nd Division (Joybell Suiam Memorial Football League), hapdeng ka Lad Mukhla bad ka Nongkhroh Sohbar ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.
Ha ka jingïalehkai kaba bud, ka Bamkamar Wah ka la jop da 3-1 kol ïa ka Hunlang FC Moobakhon.
Ïa ki kol jong ka Bamkamar Wah la thep da u Ïaishah Nongrum (2), Meshanmi Nongrum (69) & (71). Katba na ka Hunlang la thep da u Riyoo Phawa (21).
Kane ka jingïalehkai 2nd Division kan bteng biang ha ka sngi Palei hapdeng ka Main Road SC pyrshah ïa ka Nongdhar Nongthymme ha ka por 10 baje mynstep bad ka Ïawthymblein ïa ka Niriang United ha ka por 12 baje mynsngi. Katba ka jingïalehkai Super Division kan long hapdeng ka Lumphyrnai Sohphoh pyrshah ïa ka Nongkhroh Krem Kum ha ka por 3 baje nohphai sngi.
