Shillong, Nailar 06
Ka jingïai mlien ban kynthoh briew hapoh ki rynsan ‘social media’ ïa kiwei pat ka dei kaba wanrah jingktah bha ïa ka jinglong jingim jong kiba shah kren bad bunsien kane ka dei ruh kaba la ju leh da ki briew kiba lyngkot ha ka jingmut jingpyrkhat bad kiba ju mlien tang ban kynthoh bad byrngem briew tang lyngba ka mobile phone.
Kum kine ki jait jingmlien ki la ju ïai jia na ka por sha ka por bad ki la don hi ruh ki briew kiba la shah kem bad shah pynngat ha ki kyndon aiñ bapher bapher namar ka jingkren palat pud jong ki.
Hapoh Ri India, ki don ki aiñ bad ki kyndon kiba lah ban pynngat ïa uno-uno ne kano-kano ka briew kiba ju mlien ban leh ïa kine ki kam byrngem bad pynthohbria ïa ki briew da kaba shah pynshitom katkum ka IT Act, 2000 bad ka Indian Penal Code (IPC).
Ha kawei ka jingjia shah byrngem byrsit, u samla rangbah ïa uba la tip kyrteng kum u Bah Pynskhemlang W. Uriah bad uba dei u Managing Director jong ka JETS 24×7 u la shah byrngem byrsit ha uwei u briew ha Youtube uba la buh kyrteng ïalade kum u Keithryntathiang kaba la jia ha ka 1 tarik Nailar, 2025.
Katkum ka ejahar ba la ujor da u Bah Pynskhemlang ha ka 6 tarik Nailar, 2025, ha u Officer-in-charge jong ka thanad Lumdiengjri, la ong ba utei u briew uba la ai kyrteng ïalade kum u “Keitryntathiang” ha Youtube, ha ka 1 tarik Nailar, 2025, u la thoh bad byrngem byrsit ïa u Bah Pynskhemlang da kaba ong ba lah dei ban pynjah klep ïa u Bah Pynskhem ban lait ka huri hura.
Nalor kata, utei u khynnah u la thoh ruh ïa ka jaka sah jong u Bah Pynskhemlang kaba long ruh kaba buh jingma ha ka ïaid ka ïeng bad ka jinglong jingim jong u Bah Pynskhemlang.
Kane ka jingshah byrngem byrsit u Bah Pynskhemlang ka dei hadien ba u la mih ha ki lad pathai khubor ba dei ban khang noh ïa ka App Rapido namar ba ka kamai be-aiñ khlem ka laisen.
