New Zealand, Nailar:
Kawei ka briew nong New Zealand ka la shah kem noh ha ka Sngi U Blei hadien ba la lap ia kawei ka khyllung 2 snem napoh ka synduk jaiñ jongka katba ka dang shong ha kawei ka bos paidbah.
U Detective Inspector Simon Harrison, u la ong ba ia katei ka longkmie la pynngat ha ki kyndon aiñ halor ka jingleh dusmon bad jingpynshitom beit ia ki khyllung- khynnah.
La ong ba ki pulit ki la ioh ia ka phone na kawei ka jaka pynieng bos ha Kaiwaka, kaba jngai kumba 100 kilomitar (62 mer) na ka phang Shatei jong ka nongbah Auckland, hadien ba u nongñiah jong katei ka bos u la sngew pher ia ka pla kaba tyllun ha ka por ba la buh ban sangeh.
“Haba u nongñiah kali u la plie ïa ka synduk jaiñ, la shem pynban ba don da ka khynnah kynthei kaba dang ar snem ka rta”, la ong u Harrison.
“La iathuh ba katei ka khynnah kynthei ka la shit bha, watla katta, ym shym la iohi dak ba kan don kano- kano ka jingpynshitom ha ka met jongka.”
U Harrison u la ong ba katei ka samla ka don ha hospital hapoh ka jingpeit bniah kaba bniah bha.
Haba iadei bad kane, ki pulit ki la kem noh ia katei ka longkmie kaba la don 27 snem ka rta bad bud- dien bad pyniaid ia ka jingtohkit kaba bniah.
U Harrison u la ong ba u nongñiah jong katei ka bos u dei ban ioh ka jingiaroh kaba khraw naba u la lah ban tehlakam ia katei ka jingjia kaba lah ban wanrah ia ka khubor kaba sniew bad kaba sngewsih khamtam ia katei ka khynnah 2 snem ka bym pat tip ia kaei- kaei ruh.
