Shillong, Nailar 06
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka na kylleng ki jaka, ka jingshah prong tuh jong ki ïing bad kiwei ki kam tuh.
Ha ka khubor kaba la ïoh lum na ki pulit lyngba ka website, la ong ba ha ka 4 tarik mynta u bnai, ki runar bym lah ban ithuh, ki la prong tuh ha kawei ka ïing ba la sah wai da ka Rina Ranee kaba don ha Wahdienglieng ha East Khasi Hills bad ban tuh ïa ar tylli ki iPads, ar tylli ki phone ear buds bad kawei ka baje deng kti.
Ha kawei pat ka khubor, ka Wendy N Sangma ka la ai ka jingujor ba ha ka 1 tarik mynta u bnai, ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML08-J-1666 na ka phyllaw jong ka jaka sah ka jong ka, kaba don ha Lapalang, Shillong.
Kumjuh ruh na ka liang jong ka Mampi Das ka la ai ka jingujor ba hapdeng ka 22 tarik Naitung bad 4 tarik Nailar, 2025, ki runar bym lah ban ithuh ki la tuh ïa ki ar tylli ki speakers ne ki kor pynsawa, kawei ka amplifier bad kawei ka sub-woofer na ka kali kaba don ïa u registration number ML05-S-8536 kaba dei jong u kurim jong ka, na Lower Lachumiere, Shillong.
