Shillong, Nailar 06
Ka Mawlynrei SC ka la lah ban pynthikna ban jam sha ka final ha ka lympung ïalehkai U-20 Fourth Division 2025 ba la pynïaid da ka Shillong Sports Association hadien ba ka la pynliem noh ïa ka Lapalang SC da 1-0 kol ha ka sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba ka shi kol ba la thep da u Kerryland Mawlong ha ka mint kaba 16.
Ha kane ka jingïakhun semi final kaba nyngkong, uwei na ki rangïalehkai ka Lapalang u la shah beh shi syndon na madan hadien ba u la ïohpdiang da ka red card hashwa ban kut ka kylla step. Hapdeng ka jingïalehkai sa tang shiphew ngut, ka Mawlynrei kam shym la lah ban shim ïa ka kabu na ka bynta ban thep kol biang, hynrei katei ka jingtam da 1-0 kol ka la ïai neh haduh kaba kut ka jingïalehkai.
Lyngba kane ka nam jop, ka Mawlynrei ka dangap mynta ban rah ïa ka nam lahduh ha kane ka lympung ha kaba ka lah ban ïakynduh pyrshah ïa ka Mawkasiang lane ka Lummawbah, ki ban ïakhun ïa ka semi final kaba ar ha ka sngi Palei ha ka por 2:30 nohphai sngi.
Kumba ka paw ka Mawlynrei, Lapalang, Mawkasiang bad ka Lummawbah ki la kiew kyrdan sha ka Third Division ha kaba kin ïoh ban shim bynta naduh ka aïom ka ban wan.
