Shillong, Nailar 06
Ka Khasi Students’ Union (KSU), Umiam Circle ha ka por 6 baje mynstep ki la ïoh jingtip ïa ka jingdon jong ki mynder kiba wan lyngba ka kali AS25-CC-4375, bad la suba ba la ïalam ïa kine ki mynder da u briew uba kam ïalade kum u pulit.
Katkum katei ka jingtip, ka seng hapoh ka jingïalam u President Bah Bashem Kharnaior, ryngkat bad u Asst. Organising Secretary Bah Banshan Nongbsap lem bad kiwei ki nongïalam jong ka seng, la ïathuh ba utei u briew u la pyni ïa ka Police Identity Card kaba don kyrteng Brill Rongpeit, kaba la kam ba la pynmih da ka ophis jong u Commandant, 1st Batta-lion, Meghalaya Police, Mawiong, Shillong.
Ha ka por jong ka jingïakren bad ka jingbishar, ka KSU ka la lap ba utei u briew u la lum pisa haduh T.1,000 na manla uwei na ki san ngut ki bar jylla kiba la shong ha katei ka kali bad la ong ba katei ka pisa ka dei kum ka bai rung sha ka jylla.
Hynrei ha ka por ba ka seng ka dawa ban pyni ïa ki kot ki sla kiba pynshisha ïa katei ka jinglum pisa, u briew uba kam ïalade kum u Pulit lem bad kitei ki san ngut ki bar jylla ki la phet krad noh na ka jaka, khlem ai jingpynshai eiei.
Ka jingphet noh kynsan jong utei u briew bad kitei ki bar jylla ka la nang pynjur shuh shuh ïa ka jingsuba sniew jong ka seng ïa kitei ki briew bad ruh ïa utei u briew u ba kam ïalade kum u Pulit. Ka KSU Umiam Circle ka la pyntip noh mar mar sha ka KSU Mawlai Circle ban ïatreilang ha ka jingbuddien bad ban lap ïa kito kiba donkti, namar kane ka jingjia ka pyni ba ka don ka jingkheiñ sting ha ka rukom peit ïa ka jingrung jingmih bad ka lah ruh ban don ka jingïatreilang kaba be-aiñ kaba ai lad ïa ka jingrung be-aiñ jong ki bar jylla.
Ka KSU ka pynpaw ba kane ka jingjia ka long kaba sngewsih bad kaba pynbitar shikatdei eh, khamtam ha kane ka por ba ka jingrung kyrthep jong ki briew nabar jylla sha ka jylla Meghalaya ka la nang kiew stet.
“Ka jingdon u briew uba kam ïalade kum u pulit bad uba lum pisa na ki bar jylla ban ai lad ïa ka jingrung jong ki ha ka jylla, ka dei ka kam kaba die tad dor ïa ka hok bad kheiñ troiñ ïa ki trai jylla bad ka jingpyndonkam bakla ïa ka uniform pulit”, ong ka Seng.
Ka Seng kala ong ruh ba ki bor pulit ki dei ban peitngor bad tehlakam ïa ka jingrung bad jingmih be-aiñ, hynrei kane ka jingjia ka pyni ba ka don ka jingtreilang kaba sniew lane ka jingpyndonkam bakla ïa ka bor.
“Ka jingphet krad noh jong kitei ki briew ha ka por ba kylli jingkylli ruh ka pyni ba ka don ka jingthmu ban pynïap ïa ka jingshisha bad ban khanglad ïa ka jinglap”, ong ka Seng.
Ka KSU ka dawa mardor na ka tnat Pulit ka Jylla ban pynshai ïa ka jingshisha jong u briew uba la tip kyrteng kum u Brill Rongpeit.
“Ka tnat Pulit ka dei ruh ban pynshai, la u dei shisha u Pulit uba don ha ka kam bad u ba la pyndonkam bakla ïa ka kyrdan ne ka kam jong u, ne la u dei tang u briew uba kam ïalade kum u pulit ban pynïaid ïa ki kam be-aiñ. Kane ka jingjia ka pynkhih shisha ïa ka jingshaniah jong ki paidbah ïa ka tnat Pulit, khamtam haba ym shym lada kam don kano kano ka jingshai lane ka jingkit khlieh kaba biang na ka liang ki bor synshar”, ong shuh shuh ka Seng.
Ka Seng kala bynrap ruh da kaba ong ba lada ka long kaba suk ba ki briew kin pyndonkam ïa ka ID pulit khlem hok, kane ka pynpaw ba ka don ka jingsynjor ha ka jingpeitngor na ka liang kiba don ka aiñ.
Da kaba pynpaw ruh ïa ka jingsngewkhia hadien ka jingpyndam noh ïa ka jinglong nongshong shnong bad ka jingkhynra jong ka Sorkar Assam ïa ki Bangladeshi ha katei ka Jylla, ka Seng ka ong ba kane ka la pynlong ïa ka Seng ban sngewsyier ba kine ki Bangladeshi kin wan buhai shnong sha Meghalaya, kaba lah ban wanrah ïa ka jingkiew jong ka jingwan rung beaiñ (influx) sha ka jylla.
“Ka KSU ka pynpaw ba ka dang ïeng skhem ban ïada ïa ka jinglong trai, ka jingim bad ka hok jong ka Jaitbynriew. Ka seng kan dang bteng ban ïakhun pyrshah ïa kino kino ki rukom rung be-aiñ, ne ki kam kiba pynsniew ïa ka imlang sahlang bad ka jingkhanglad jong ka jingrung kyrthep ki mynder”, ong ka Seng.
Ka seng ka kyntu ruh ïa ka Sorkar bad ka tnat Pulit ba kin leh da ka jingtohkit kaba bniah bad ban pyntreikam ïa ki lynti treikam ba biang khnang ba kane ka jait jingjia kan ym mih biang ha ki sngi ban wan.
