Shillong Nailar 06
Ka Sur Paidbah ka South West Khasi Hills District hapoh ka jingïalam u Bah Kitborlang Nongrem, Chairman ryngkat ka jing synranlang u MLA ka Ranikor u Bah Pius Marweiñ bad u Bah Renikton Lyngdoh Tong-khar MLA ka Mawkyr-wat ki la leit ban ïakynduh ïa u Myntri Rangbah ka Jylla u Conrad Sang-ma halor ka jingshna pynbha ïa ka surok na Weiloi-Mawkyrwat-Khatphra (Ranikor) Road.
Haba kren sha ki lad pathai khubor u Chair-man ka Sur Paidbah u Bah Kitborlang Nong-rem u la ïathuh ba ïa ka surok ban shna na Weiloi sha Kenïong ka sorkar ka la dep mang kumba T.200 klur lyngba ka World Bank.
Kumta u la pynpaw ka jingsngewtynnad hadien ba ka sorkar ka la dep mang pisa ban shna pynbha noh ïa katei ka surok.
Kane ka surok kadei kaba ki paidbah ki la ap khmih lynti ban shna noh namar kadei ka surok kaba donkam tam na ka bynta ki paidbah ka South West Khasi Hills District khamtam eh ba naduh ba la ïoh ïa ka District ka surok ka ïai sah beit kumjuh bad mynta da ka jingïatreilang ki paidbah khlem da ñiew na kino kino ki kynhun bad mynta ka sorkar ka ladep mang ka pisa ban shna pynbha ïa ka surok, la ong u Bah Kitborlang Nongrem.
Kumta u la ai ka jingkhublei ïa ka sorkar hapoh ka jingïalam u Myntri Rangbah u Conrad K Sangma ba ka la pyndep ïa kaei ba la kular na ka bynta ka District hi baroh kawei.
Ha ba bynrap halor kane na ka liang u Bah Renikton Lyngdoh Tongkhar u la khmih lynti ba ïa kane ka surok ka sorkar kan khot tender noh kham kloi khnang ba kan long ka jingmyntoi ïa ki paidbah nongshong shnong baroh kawei.
Katba na ka liang u Bah Pius Marweiñ pat u MLA ka Ranikor u la khmih lynti ba ïa ka surok naduh Weiloi ter ter shaduh Ranikor ka sorkar kan bteng ban shna pynbha noh ïa ka.
U la ong ruh kumba ngi la ïohi ba ïa ka surok na Mawphlang shaduh sha Weiloi ka la bha lut bad ka jingangnud kalong ba na Weiloi kan bteng biang ban shna pynbha shaduh Ranikor.
Kumta u Bah Pius Marwein u la ïathuh ba na ka liang u Myntri Rangbah ka Jylla u Conrad K Sangma u la ong ba ka jingpyntrei ïa katei ka surok kan sa long ha ka bynta ba ar (second phase).
“Ngi ap satang ïa kapor ba lano ka sorkar kan pynsted noh ïa ka kam ban khot tender ban ïoh noh ïa ka jingtrei khnang ban ïoh ka surok kaba paka bad kaba bha” la bynrap u Bah Pius.
