Shillong, Nailar 06
Ka Nangkiew Irat SC ka la khur ïa ka jingjop kaba nyngkong ha kaba sdang ïa ka Shillong Premier League 2025, hadien ba ka la lah ban pynliem noh ïa ka Nongrim Hills SC da 3-1 kol ha ka sngi Balang ha SSA Stadium kaba ha First Ground, Polo.
Kane ka lympung kaba dei ka jingthrang bad ka jingangnud jong ki paidbah ba kin ïoh ban sakhi da la ki jong ki khmat ïa kane ka jingïalehkai bad ban ai jingmynsiem ïa la ki jong ki kynhun.
Ha kane ka jingïakhun ka Nongrim Hills ka la ïoh ban pynkhih jar nyngkong eh lyngba u Caldolan Kharmawphlang (13). Hynrei ka Nangkiew Irat, kaba la pynkut ban don ha ka thup kaba saw ha ka aïom ba la lah, ka la wanphai da a jingkhlaiñ bor na ka bynta ban pynphai kylla hashwa ban kut ka jingïalehkai jong ka kylla step lyngba ka jingïarap pynthep uwei na ki rangïalehkai ka liang pyrshah ha ka minit kaba 41.
Ka Nangkiew ka la ïoh ban thep biang sa ar kol lyngba u Jefferson Pakyntein (60) bad u Himanshu Patil (62).
Wat hapdeng u slap uba la theh ha ka por janmiet, pynban baroh ar ki kynhun ki la pyni ïa ka mynsiem ïakhun na ka bynta ban khur ïa ka jingjop.
Hashwa ban sdang kane ka jingïalehkai, ki nongïalam ka Shillong Sports Assocaition hapoh ka jingïalam u President u Bah Banteidor Lyngdoh, ki la ai khublei kitbok ïa ki rangïalehkai.
Kane ka lympung kan bteng biang ha ka sngi Palei ha kaba ka Sawmer kan ïakhun pyrshah ïa ka Mawlai, kaba wan ba-ar ha ka aïom ba la lah, ha ka por 5:30 janmiet.
