Shillong, Nailar 06
Ka Sorkar Jylla lyngba ka National Highways and Infrastructure Deve-lopment Corporation Limited (NHIDCL) kala pynkhreh ban jied ïa ka jaka na ka bynta ka surok Greenfield Alignment (High Speed Corridor) kaba dei ka surok 4-lane, ha ki shnong ka thaiñ Mawlai bad Mawryng-kneng.
Kine ki shnong ki kynthup ïa ka Mawsiat-khnam, Lumkseh, Lum-diengsai, Nonghali, Maw -pdang (Mawkhanu), Diengpasoh (Jaroit) bad Mawryngkneng (Maw-iong Sung).
Haba pyntip ïa kane ha ka sngi Balang, ka District Collector ka East Khasi Hills District ka la ong, “La pyntip sha ki paidbah ba kino kino ki jingtei thymmai ne ki kam pynroi ha ki jaka ba la ithuh ban shna ïa ka surok 4-lane Greenfield Alignment (High Speed Corridor) ki dei ban da ïoh jingbit shuwa ban trei na ka ophis u Deputy Commissioner”.
“Nalor kane, la kren shai ruh ba kino kino ki jingtei ba khlem da ïoh jingbit la ki dei kiba shipor ne ba shirta ba la pynïeng hapoh ka jaka ba la tyrwa pynïaid lynti ïa ka surok, hadien bala pynmih ïa kane ka notice yn ym kheiñ shuh ba kin dang ïoh ïa kano kano ka jingsiew bailutksan ha ka por ba thied ïa ka jaka ne pyntreikam ïa ka project. Kane ka treikam ïa ki jingtei ki riew shimet ne ki dukan,” ka la ong.
Ka District Collector kala ong ruh ba kane ka hukum, kan treikam noh mardor naduh ba pynmih ïa ka.
Kumjuh ruh ka Sorkar Jylla lyngba ka National Highways and Infrastructure Development Corporation Limited (NHIDCL), ka la pynkhreh ban thied jaka na ka bynta ka surok 4-Lane Greenfield Alignment (High-Speed Corridor) ka ban ïaid lyngba ki shnong kiba hap hapoh West Jaiñtia Hills District.
Kine ki shnong ki kynthup ia ki Saw Shnong – (Larnai, Thadmusem, Sohphoh bad Nongkhroh) Larnai, Thadmusem, Sohphoh, Kdohkule, Wahiajer, Mukhla Umlangshor, Mukhla Sohshrieh, Mukhla Nongrim, Mookaswan, Nongbah, Pasyih bad Thadmuthlong.
Haba pynbna ïa kane ha ka 6 tarik Nailar u Deputy Commissioner ka West Jaiñtia Hills u pyntip sha ki paidbah ba kino kino ki jingtei kiba thymmai ne ki kam pynroi ha ki jaka ba la ithuh ban shna ïa kane ka surok 4 Lane Greenfield Alignment (High-Speed Corridor) ki dei ban ïoh jingbit shwa na ka ophis u Deputy Commissioner.
U la ong ruh ba kino kino ki jingtei ba khlem ïoh jingbit, la ki dei kiba shipor ne kiba shirta kiba la pynïeng ha ki jaka ba la tyrwa pynïaid ïa kane ka surok hadien ba la pynmih ïa kane ka jingpynbna yn ym kheiñ shuh kum ki ban dang ïoh ïa kano kano ka jingsiew bai lutksan ha ka por ba thied ïa ka jaka ne ha ka por ba pyntreikam ïa ka project. Kane ka kynthup lang ïa ki jingtei ki riew shimet kumjuh ki jingtei na ka bynta ki kam khaïi pateng.
U DC u la ong ruh ba kane ka hukum kan treikam noh mardor naduh ba pynmih ïa ka.
