Agartala, Nailar:
Ka sorkar Tripura ka la bynshet sha ki pulit ban ïakhun pyrshah ïa ki nongdih drok, u Myntri ka tnat Transport and Tourism jong ka Tripura u Sushanta Chowdhury uban jur ïa ka jingdonkam ïa ka jingpynsngewthuh paidbah bad ka jingïashim bynta ha ka imlang-sahlang.
Ki la don ki jaka ban pynbha pat ïa kine ki briew kiba la ngop ha ki jingdih pynbuaid kum shi bynta ban ïarap ïa ki.
U Sushanta u la ong ba kawei ka bynta jong ki briew, kiba trei pyrshah ïa ka India, ki pyndonkam ïa u pud u sam jong ka pyrthei, kum ka lynti ban shalan ïa u drok, hynrei mynta, la ai kti laitluid ïa ki pulit, ba kin kem ïa ki nongkhaïi drok.
U la ong ba kane ka sorkar jylla kaba mynta kam don jingkheiñ ban ïakhun pyrshah ïa u drok.
“Ko Myntri Rangbahduh ka ri Narendra Modi, Myntri ka tnat ki kam pohïing Amit Shah, bad Myntri Rangbah ka jylla u Dr Manik Saha, ngim kwah ba kino kino ki samla kin shah pynbuaid ha u drok. Hynrei ka don ka bor kaba trei pyrshah ïa ka ri India da kaba pyndonkam ïa u pud u sam jong ka pyrthei ban pynrung ïa u drok shapoh ka ri jong ngi. Ka jingpynsngewthuh ka dei ban kiew. Ha kane ka liang, ka sorkar jylla ka trei kam”, la ong u Myntri.
U Myntri Rangbah u la ong ba mynshwa ka Tripura kam don satia ka jaka ban pynbha ïa ki nongdih drok, hynrei mynta ka sorkar jylla ka dang trei ban buh ïa kum kine ki jaka.
“Mynshwa ym shym la don ka jingai laitluid ïa ki pulit, hynrei mynta la pynkupbor ïa ki. Man la ka sngi la ïoh kurup ïa u drok. Ngi dang trei ha kata ka liang, u Myntri Rangbah ka jylla u la ong shai ba ym don mano mano ruh ban lait ha ka jingïakhun pyrshah ïa ki nongkhaïi droks. Ngi don ka jingïakhun tyngeh pyrshah ïa u drok”, u la ong.
Shuh shuh u la pyntip ba kane ka sorkar jylla ba mynta bad u Myntri Rangbah ka jylla ki la trei na ka bynta ban kyntiew ïa ka tnad ka koit ka khiah.
U la ong ruh ba ka la don ka por ba ki samla pule ki hap ban leit shabar ka jylla na ka bynta ki jingpule bad ki jingsumar, hynrei mynta ka sorkar jylla ka dang shna ïa ki jingtei bad pynbiang ïa ki jingdonkam baroh.
