Nongpoh, Nailar 07
U Bah Charles Marngar, MLA jong ka Mawhati ha ka sngi Palei u la ïoh ban pyllait paidbah ïa ka kali kit nongpang jong ka shnong Khliehumstem, kaba la ai kyrteng Rapha Healthcare Services Khliehumstem ïa kaba la bei tyngka lyngba ka skhim Chief Minister Special Development Fund (CMSDF).
Ha kane ka sngi la wan ban ïadon ryngkat da ka Dr. Anju R Marak, District Medical and Health Officer (DMHO) ka Ri Bhoi District, u Dr E Tlang ba dei khmih ïa ka Mawlasnai CHC, u Bah F Teron, Rangbah Shnong ka Khliehumstem nalor ki paidbah nongshong shnong kiba la wan ban sakhi lang ïa kane ka jingïalang.
Haba kren ha kane ka sngi, u Bah Charles Marngar u la pynpaw ïa ka jingsngewnguh sha u Conrad K Sangma, Myntri Rangbah ka jylla, ïa uba la ai nam ruh kum uta u Myntri Rangbah jong ki paidbah, halor ka jinglah ka jong u ban pynbit pynbiang ïa ki jingdonkam jong ki paidbah bad pynpaw ruh ba kane ka jingaiti ïa kane ka kali kit nongpang, kan long ka jingmyntoi kaba khraw ïa ki paidbah jong ka thaiñ khamtam ha ka por jong ki jingjia jingpang jingshitom.
Na ka liang jong ki paidbah nongshong shnong ka thaiñ, ki la pynpaw ïa ka jingsngewnguh shikatdei ïa u MLA bad ka Sorkar Jylla kiba la sngap bad ïohsngew ïa ki jingud jingnam ki jongki kat haduh ba kala urlong ha kane ka sngi bad ai ruh ka jingkhublei kaba kyrpang sha u Myntri Rangbah ka jylla, u Conrad K Sangma.
