Shillong, Nailar 07
U Myntri ka Sorkar Jylla, u Marcuise N. Marak myn ha ka Lah Sngi U Blei u la pynpaw ba um don jingtip eiei halor ka jingbujli shuki Myntri, da kaba ong ba ha kaba kut, ka shong ha u Myntri Rangbah ka Jylla, u Conrad K. Sangma ban rai halor kane ka bynta.
U Marak u la pynpaw ïa ka jinglong kloi jong u ban trei ha kano-kano ka jaka ba la bynshet kam ïa u, da kaba ban jur ïa ka jingaiti lut jong u ïa ka seng.
“Ka shong ha u Myntri Rangbah. ngi khmih lynti ïa u. Kum u State Working President jong ka seng, ngan sngewkmen shi kat dei ha kano-kano ka jaka lada buh ïa nga ban trei,” u la ong haba kren sha ki nongthoh khubor.
U Marak u la kam ba um don jingtip eiei halor kano-kano ka jingthmu ban bujli shuki Myntri, da kaba kdew ba u pynleit jingmut ha ki jingïalang bad ki kam jong ka seng.
U la pynpaw ba u la bunkam ha ki kam jong ka seng bad um shym la ïoh jingtip eiei shaphang ki jingkylla kiba lah ban wan jia ha ka Kynhun Myntri.
Haba kylli halor ka jingïakynduh ba dang shen hapdeng u Myntri Rangbah ka Jylla bad ki MLA na Ri-lum Garo, u Marak u la ong ba uwei-pa-uwei u MLA u la pynpaw ïa ki kam bad ka jingpyntreikam ïa ki skhim.
Hynrei u la kren shai ba katei ka jingïalang kam don jingïadei eiei bad ka jingbujli shuki Myntri hynrei ka jingïalang ban bynshet ïa ka jingkitkhlieh ha ki MLA bad ban pynïabeit laiñ bad ka jingthmu jong u Myntri Rangbah na ka bynta ka Jylla.
Shuh shuh u Marak u la bynrap ka jingïalang ka long shi bynta jong ki jingpyrshang u Myntri Rangbah ban pyntikna ba ki MLA ki trei ban kynjoh ïa ka thong jong u na bynta ka Jylla
Na ka liang jong u Myntri, u la ïathuh ruh ba u Myntri Rangbah u la sngewhun haba ïadei bad ki jingpynpaw jong ki MLA bad kular skhem ban ïaid shakhmat bad ki kam ki jam hapoh ka Jylla.
