Shillong Nailar 07
Halor ka jingshah ujor Public Interest Litigatuon (PIL) ka Khasi Hills Autonomous District Council (KHADC) ha ka Synkhong Rympei Thymmai (SRT) sha Meghalaya High Court halor ka jingshah pynduh ST ïa kiba ai jait kpa bad ïa ki kynthei bym dei ki Khasi kiba jied ban shim ïa ka jait u tnga jong ki, ka la pynlong ïa ka Synjuk ki Rangbah Kur ka Bri u Hynniewtrep (SRKBH) ha ka 07 tarik u Nailar 2025 ban leit ïa kynduh ïa u CEM ka KHADC u Bah Shemborlang Rynjah.
Kane ka jingleit ban ïa kynduh ka Synjuk ki Rangbah Kur ka Bri u Hynniewtrep (SRKBH) ïa u CEM kadei ban ai mynsiem ïa ka KHADC ba kan ym dei ban duh jingkyrmen halor katei ka jing shah ujor, hynrei kadei ban ïakhun ïa ka jingpynneh ïa ka riti ka dustur jong ki Khasi kiba dei shim jait na ka Kmie.
Ha kane ka sngi la lam khmat da u Bah R.L.Kharpran president, Dr.R.L.Blah u nongaiktien ryngkat ki nongkitkam ba hakhmat ka synjuk.
Haba kren sha ki lad pathai khubor u Nongaiktien ka Synjuk ki Rangbah Kur ka Bri u Hynniewtrep u Dr.R.L.Blah u la ong ba ka District Council ka dei ka kmie kaba kdup bad kaba ri ïa ngi kiba dei ki riew lum kiba shim jait na ka kmie bad ruh kaba ïada ïa ka khyndew ka shyiap bad ka riti ka dustur jong ngi.
“Dei halor kata ka nongrim ba ka synuk ka wan ban ai jingkyrshan ïa ka District Council” la ong u Dr.R.L.Blah . Da kaba bynrap ruh ba ka synjuk hi ka ai jingkyrshan ïa ka KHADC ban ïakhun halor kane ka jingshah ujor.
