Shillong, Nailar 07
ka lympung ïalehkai East Khasi Hills District Open Badminton Championship 2025 ba la pynïaid da ka East Khasi Hills District Association ka la sdang ha ka sngi Palei ha Indoor Hall kaba don ha JN Sports Complex, Polo.
Ha kane ka lympung wan shim bynta da 103 ngut ki nongïalehkai naduh ki kyrdan ïalehkai sub-junior, junior bad senior.
Ïa kane ka lympung la wan ban plie da u Bah Olan Sing Suin, MLA ka Mawsynram Constituency, ha kaba u la ai ka jingïaroh ïa ka East Khasi Hills District Badminton Association halor ka jingshim khia ban pynlong ïa kane ka lympung manla u snem na ka bynta ban kyntiew ïa ki sap ïalehkai badminton jong ki khynnah ha kane ka thaiñ.
Te kumta u la ai khublei ïa katei ka synjuk ba kan lah ban pynïaid beit ïa kane ka lympung bad kular ruh ïa ki lad jingïarap na ka bynta katei ka synjuk.
Ki dkhot kiba la don lang ha kane ka sngi plie ki kynthup ïa u Dr. C.O Ryngad, Adviser ka EKHDBA, Kong Pondora Rapsang, President, Bah Goldenstar Kharbuli, Vice President bad kiwei kiwei.
