Guwahati, Nailar:
Uwei u heh nongïalam jong ka kynhun United Liberation Front of Asom-Independent (ULFA-I) kaba la shah ñiew beaiñ, u Janardan Gogoi, ïa uba la tip ruh da ka kyrteng kum u Jit Asom, u la leit pyndem noh ïalade ha ki bor synshar ha Nagaland.
Naduh katei ka por ba u la leit ban pyndem ïalade la ïalam ïa u Gogoi sha ki pulit jong ka Charaideo distrik ha Assam, ha kaba la kem bad tohkit ïa u. Kane ka jingjia ka wan kum shi bynta jong ka jingpynkhreh kaba jur ban ïakhun pyrshah ïa ki lehnoh.
U Gogoi, uba wan na ka Tinsukia distrik jong ka Assam, u dei u dkhot ba trei borbah jong ka kynhun ULFA-I, kaba la ïalam da u Paresh Baruah.
Ka jingwan pyndem jong u, ka dei ka jingmih beit na ka jingpynbor kaba jur na kawei ka Unified Command, kaba kynthup ïa ki pulit Assam, ki Assam Rifles bad ki shipai India, kiba treikam ha Upper Assam bad ha khappud bad ka Nagaland.
La khmih lynti ba ki heh pulit kin ai ïa ki jingtip ba kham bniah shen, kynthup la u Gogoi u la aiti ïa kino kino ki tiar ne ki kot ki sla kiba kongsan. Ka jingïakren jong u ka lah ban ai ïa ki jingtip kiba kordor halor ka jinglong hapoh jong ka ULFA-I, ki jaka ba don ki ktem, bad ki jingïadei ha Assam bad Myanmar.
