Guwahati Nailar:
U Myntri Rangbah ka jylla Assam, u Himanta Biswa Sarma, u la pynbna ha ka sngi Balang ban tei ïa san tylli ki jingkieng ïaid kjat bathymmai ha shilynter ka jaka ba bun briew jong ka Khanapara-Jalukbari ha Guwahati ban pynthikna ïa ka jingïaid lynti kaba shngaiñ na ka bynta ki nongleit nongwan.
Kane ka sienjam ka thmu ban pynduna ïa ki jingjia aksiden bad ban pynbha ïa ka jingpynïaid kali ha kawei na ki lynti ïaid kali kaba bun paid tam ha ka nongbah.
Ïa kane ka rai la pynbna hadien ba u Myntri Rangbah u la bishar bniah ïa ki jingtei kiba dang ïaid shakhmat ha ka nongbah.
Kham hashwa ha kane ka sngi, u Sarma ryngkat ka kynhun na Bhutan u la leit jngoh ïa ka International Terminal kaba dang shna mynta ha Lokpriya Gopinath Bordoloi International (LGBI) Airport.
Haba kren bad ki lad pathai khubor hadien ka jingjurip, u la pynpaw ba la khmih lynti ba kane ka Terminal kan long kaba la pynkhreh ha kaba kut jong u bnai Naiwieng, jong une u snem.
U Sarma u la ïasam ruh ba u thmu ban khot ïa u Myntri Rangbahduh ka ri u Narendra Modi na ka bynta ka jingplie paidbah ïa ka Terminal thymmai, kaba dang pynwandur ban kyntiew shibun ïa ka jingïadei bad ki ri pyrthei bad ban kyntiew ïa ka jingdon jong ki nongleit nongwan ha ka thaiñ Shatei-Mihngi.
