Shillong, Nailar 07
Ka Sorkar Jylla ka don pynkhreh ban wanrah ïa ka aiñ thymmai ka ban tem ïa ka kam ba ïadei bad ka jingwan rung kyrthep ki briew nabar shapoh ka Jylla, hadien ba mad ïa ka jingeh haba pyntreikam ïa ka Meghalaya Residents Safety and Security Act (MRSSA).
U Myntri Rangbah ka Jylla u Conrad K Sangma u la ong, ka Sorkar ka dang pynkhreh ïa ka lynti kaba khlaiñ ban peitngor ïa ka jinglong jingman, haba shimkhia ïa ki kam kiba ïadei bad ka jinglong jingman ka shongsuk shongsain bad ki jingjia kiba jia ha Assam bad ha Bangladesh.
“Haba ïadei bad ka kam ban peitngor ïa ka jinglong jingman halor ka jingwan rung ki briew shapoh ka Jylla bad kiba mih na Jylla, ka dei ka kam kaba sngewkhia haba puson ïa kiba bun kiei kiei, ki jingjia kiba jia ha Assam, ki jingjia kiba jia ha Bangladesh. Kumta lada phi peit ïa ka rukom long ka shongsuk shongsain, ka long kaba donkam na ka bynta jong ngi ban wanrah da ka aiñ kaba khlaiñ,” ong u Conrad haba kren sha ki lad pathai khubor ha ka sngi Palei.
U Myntri Rangbah u la ban jur ba ka Sorkar kan sa khot ïakren ïa ki nongïalam na ki kynhun bapher bapher hashuwa ban sam ïa ki jingtip ba bniah sha ki paidbah.
“Ngi la mad ïa katto katne ki jingeh haba phai sha ka MRSSA. Namarkata, haba pynshong nongrim na ki jingïakren bad ka tnat aiñ bad kiwei kiwei ki riew shimet bad ruh ka jingïasyllok bad ki Myntri Sorkar bad ki heh ophisar, ngi la pyrshang ban leh eiei. Nga sngew ba kan dang kloi palat ïa nga ban ai ïa ki jingtip kiba bniah halor kane. Ngin sa khot ïakren ïa ki nongïalam ki kynhun bapher bapher bad hadien kata ngin sa sam ïa ki jingtip bad ki paidbah,” la ong u Conrad.
U Conrad dang shen u la pyntip sha u Myntri ka tnat Kam Pohïing ka Ri halor ka jinglong jingman ha ki jaka khappud ka Assam bad Meghalaya bad kumjuh ruh ha khappud ka India-Bangladesh, haba pynpaw ïa ka jingkongsan ban don ki lad jingïada napoh ïing lajong.
“Nga la pyntip ïa u Myntri ka tnat Kam Pohiing ka Ri halor ka jinglong jingman ha ki jaka khappud ka Assam bad Meghalaya bad kumjuh ruh ïa ka jinglong jingman ha khappud ka India bad Bangladesh. Na ka kam shongsuk shongsain, hooid u la don lut ïa ki jingtip kiba wan sha u na ki bor syntiat hynrei kum u Myntri Rangbah ka Jylla, ka dei ka kamram jong nga ban pyntip sha u ïa kaei kaba jia bad ki lad jingïada bala shim bad kumjuh ruh kaei kaba jia ha khappud jong ka India bad Bangladesh,” u la pyntip.
