Shillong, Nailar 07
Ka jingïalang jong ka Meghalaya Cricket Association, ka la shong ïakynduh ha ka sngi Palei ha shlem treikam ka MCA kaba don ha JN Stadium, Polo.
Ha kane ka jingïalang, nalor kiwei kiwei ki mat kiba la ïakren, la phaikhmat ruh pat sha ki kato katne ki jingkynthoh bad kynnoh jong u Divension Lyngdoh, uba la don sha ka thup jingpyrshang (trial) na ka bynta ka wat kaba nyngkong lyngba ka synjuk jong ka South West Khasi Hills District Cricket Association, kaba long ha ka por ba ka MCA ka la pynlong kum shi bynta ban lah ban pynrung kham bun ki khynnah lajong sha la ka jong ka kynhun ïalehkai, na ka bynta ki samoi ïalehkai kriket kiban wan.
Na ka liang u Divension Lyngdoh, lah ban ong ba u khlem lah satia ban kynjoh ia katta ka thong ba un lah pat ban jam sa sha ka wat jingpyrshang kaba ar, kaba hangne, u la mih pynban shakhmat ban kynthoh bad ban kynnoh pyrshah ïa ka Meghalaya Cricket Association, kiba la mihpaw ha ki lad pathai khubor (pring & electronic) ha ka 25 tarik u Naitung 2025.
Ka jingïalang ka ñiew bad shim ba kum kine ki jait jingkynthoh, beit beit ka thew sha ka jingbym sngewtynnad bad kaba la shu ïaleh ban ïada rapjot jubor ïa ka jingbym lah ban paw bha ha ka por ba la pyrshang, kaba ha ka jingshisha un jin da la dei ban kut jingmut ban dangïai im sngi ban kilan bad aiti met bad mynsiem khnang ban lah ban shah jied ban mihkhmat ia ka jylla.
Kane ka jingïalang Apex Council, kampher wat lada na ka liang u Divension Lyngdoh u la wan hi biang shakhmat ban panmap ïa ka jingkren bad kynthoh ka jong u, hynrei ynda haba la pynshong nongrim bha, kaei kaba u la leh bad thad ha ki lad pathai khubor, ki lam beit sha ka kam pynjah burom, ïa kaba ka lah ba kan wanrah pynban ïa ka jingïapher jingmut bad ka jingïadei kaba ïajan bha bad ki synjuk ïalehkai, ki nongpynïaid, ki nongjied ïa ki nongïalehkai.
Nalor katta kum kine ki jait jingkynnoh ka pynsuba sniew ruh wat ïa ka jingjied ïa ki nongïalehkai (selection committee) ka MCA, lada pyndonkam bad ki kor ki bor, khnang ban pyntikna ba kan long kaba biang, kaba khuid ba suba bad bym don dak eiei.
Ka jingïalang ka pynpaw ba ha kane ka kynti kaba mynta, ka rukom ban jied ka dang long kaba janai bad kaba bniah bha, kaba da kylla kum kine ki jait kynthoh, ki long ki bym lah ban pdiang bad bym don nongrim, hynrei kaba shu pynpaw ïa ka jingsngew shrai namar ka jingbym lah ban ïalehkai bha da u rangïalehkai.
Kumta ka jingialang ba mynta ka sngi ka Apex Council, ka la shim ia ka rai ba kum kine ki rukom kynthoh bad jingkynnoh ki bym lah ban pynshisha, la ñiew bad shim kum ka jingthmu ban shu pynbud nam bad ban pynjah burom da u rangialehkai ka thew bad lam sha ka jingbym don discipline ka jong u.
