Nongpoh, Nailar 08
Ka long ka sngi ka ban sah jingkynmaw ïa ki paidbah ka thaiñ Umroi hadien ba u Myntri ba dei khmih ïa ka tnad Community and Rural Development ka Jylla, u A.T. Mondal mynta ka sngi u la wan ban plie paidbah ïa ka ‘Traditional Market’ lane kata ka ïew die lang jong ki paidbah nongrep ka thaiñ ha ka shnong Lumdaitkhla, Bhoirymbong.
Ïa katei ka ‘Traditional Market’ kaba la tei ha ka jinglut kaba la kot T. 5 klur lyngba ka Ministry of Tribal Affairs, kan long ka jingmyntoi kaba khraw ïa ki paidbah nongrep jong ka thaiñ Umroi ba kin ïoh ban pynïaid ïew bad die ïa la ki mar-rep jong ki, da kaba phaikhmat kyrpang sha ki mar rep kiba khlem ai dawai bad ha kane ka ïew, ki don haduh 66 tylli ki dukan.
Ha kane ka sngi, la wan ban ïadon ryngkat lang ruh da u Bah A.L. Hek, Myntri Sorkar ba dei khmih ïa ka tnad Animal Husbandry & Vaterinary, u Bah Damanbait Lamare, MLA ka Umroi, u Bah Isynei Hinge, MDC ka Umroi, u S.C. Sadhu, Director ka Community and Rural Development, ka Dr. Rimica Talang, BDO ka Bhoirymbong C &RD Block, u Bah S.T. Rympei, Rangbah Shnong ka Lumdaitkhla Bhoirymbong nalor kiwei.
Haba ai jingkren ha kane ka sngi, u Mondal u la pynpaw ïa ka jingsngewkmen ban ïadon bynta lang ha kane ka sngi kaba kyrpang kaba la lah ban plie paidbah ïa kane ka iew kaba kyrpang ka ban ai jingmyntoi shi kat dei ïa ki paidbah ka thaiñ, khamtam ba kin ïoh ban pynïaid ïew ïa ki marrep jong ki lyngba kane ka Complex kaba la shna kyrpang ba kin lait na ka sngi, u slap bad ‘Pump’ um.
U la ong ruh ba kane ka Sorkar hapoh ka jingïalam u Myntri Rangbah, u Conrad K. Sangma ka la theh bun ka pisa ban kyntiew ïa ka ïoh ka kot ka jong ki paidbah nongkyndong ha kiba bun ki liang, la ka dei lyngba ka jinglah ban plie ïa ki C&RD Block ha kylleng ki District ka Jylla, ka jingiarap ïa ki SHG bad kiwei bad bynrap ba kumba u Myntri Rangbah u don ïa ka thong ban kyntiew ïa ka Jylla kum kata ka 10 ‘Billion Dollar Economy’, ka jingkiew jong ka ïoh ka kot ha ki thaiñ nongkyndong kan ïarap ruh ban pynurlong ïa kane ka jingthmu jong u Myntri Rangbah ka Jylla.
Shuh shuh, u Mondal u la kyntu ïa ki paidbah ka thaiñ ba kin trei shitom bad pyndonkam hok ïa kane ka ïew ba dei lyngba ka jingshimkhia ka jong ki ba yn sa lah ban pynlong ïa kane ka jaka, kum ka ïew kaba lah ban pnïaid ïew ia ki marrep ki jong ki kiba khlem ai dawai, ha kajuh ka por ban khring ruh ïa ki nongwan jngohkai pyrthei lyngba kane ka jaka.
