Shillong, Nailar 08
Ka shlem treikam u Sub-Divisional Officer, Sohra Civil Sub-Division ryngkat bad ka Sohra Sports Association, kan pynlong ïa ka jingïakop mareh kaba la tip kum ka “10K Independence Day Run 2025” ka ban long shi bynta ban rakhe ïa ka Independence Day ha ka 15 tarik mynta u bnai.
Kane ka jingïakop mareh kan sdang ha ka por 6 baje mynstep na Maraikaphon Football Ground, Sohra bad kan kut ruh ha Maraikaphon. Ïa ki nongshim bynta kynthei bad shynrang la phiah ha la ki jong ki kyrdan kata 18 haduh 35 snem bad 35 snem shaneng.
Kat kum ka kyrwoh la ong ba ki nongïashim bynta ki lah ban shim bynta naduh 18 snem shaneng bad kiba dei kiba shong bad sah hapoh jong ks Sohra Civil Sub-Division. La bthah ba baroh ki dei ban wanrah ïa ka card Epic kum ka jingpynshisha.
Na ka liang ki bor pynïaid ki la pynkhreh ïa ki khusnam pisa na ka bynta baroh ki nongjop. Ka tarik kaba khatduh ban pynrung kyrteng ïa ki nongïashim bynta kan long naduh 11 haduh 13 tarik mynta u bnai ha Conference Hall jong u Sub-Divisional Officer, Sohra naduh ka por 11 baje mynstep haduh ka por 4 baje janmiet.
