Shillong, Nailar 08:
Ka Kong Biolin Pyrtuh kaba dei ka President jong ki nongshong die jingdie ha madan ka la kyrpad ïa ka Sorkar ba kan ai noh ïa ki syrnod Certificate of Vending (CoV) sha kito ki bym pat ïoh bad kiba dei hok ruh ban ïoh ïa katei ka syrnod ba kin ïohlad ban shong die jingdie lang noh kumba ïoh lem kiwei shapoh ka jaka pynïeng kali kaba don ha Meghalaya Urban Development Authority (MUDA), Khyndai Lad.
Ïa kane, ka Kong Biolin Pyrtuh ka la pynpaw haba ïakren bad ki lad pathai khubor ha ka 08 Tarik u Nailar, 2025 hadien ba da ki phew ngut kiba shongdie madan ki la ïa mih biang ha surok Khyndai Lad ban ïakhih namar ka jingbym pat ïoh jong ki ïa ka syrnod CoV.
Ka la ïathuh ruh ba ki don bun ngut ki bym dei hok ban ïoh ïa ka COV hynrei ki la ïoh, kumta naka liang ka kynhun ka la knieh noh ïa ka COV na ki namar ba ki shu shna tuh ïa ka EPIC Card tang ban ïoh shong die jingdie ha madan.
Ka la ong ba watla naka liang ki bor ba dei khmih ki la ong ban ap haduh shitaïew ban ïakren halor kane ka bynta hynrei ka Kong Pyrtuh ka la bynrap da kaba ong ba ka kpoh kam ap haduh shitaïew-artaïew hynrei ka kpoh ka dawa bad ka thngan manla ka sngi.
Kumta, ka la ong ba ka Sorkar ka dei ban leh kham kloi ban ai noh ïa ka CoV sha kine ki bym pat ïoh khnang ba kin ïoh ban shong die jingdie hapoh MUDA.
“Nga kyrpad ïa ka Sorkar ba kan shimkhia noh ban ai noh CoV noh ïa ki namar ba ka dei ka hok jong ki. Hynrei napdeng kine ruh, ki don ki bym dei hok ban ïoh hynrei ki don ruh pat kiba dei hok ban ïoh namar ba ki dei nongshong shnong hangne hi bad lada ki duh nangne kim don jaka ban leit shano shano ruh”, la ong ka Kong Pyrtuh.
