Tura, Nailar 08
Ka A’chik Holistic Awakening Movement (AHAM), Bajendoba Regional Unit, ha ka Sngi Thohdieng ka la pynpaw ïa ki jingsngewkhia ha kaba ïadei bad ka jingshngaiñ ba ki nongshong shnong ka Borojora bad Sualmari ki ïakynduh, kiba don ha khappud Meghalaya-Assam hapoh North Garo Hills District, bad kyntu ïa ki bor ba dei khmih ban buh ïa ka Police Outpost ha ka thaiñ.
Katkum ka jingïathuh ka seng, dang shen la aiti ruh ïa ka dorkhast halor katei ka bynta sha u Myntri Rangbah ka Jylla, u Conrad K. Sangma. “Ka jingdawa ka la nang kham kyrkieh haba phai sha ki jingkyndang ba dang shen ba la pynlong da ka Sorkar Assam – kaba la nang pynjur ïa ka jingbym shngaiñ bad jingtieng hapdeng ki jaidbynriew trai-ri trai-muluk kiba shong ba sah ha kine ki jaka ba don jingma. Ka jingbym don ki jingtei jong ka tnad pulit hangne, ka wanrah ïa ka jingeh kaba khraw ha ka liang ka shong-suk shong-shngaiñ – kaba buh jingma pat ïa ki paidbah kiba lah ban shah ktah ha kiba nabar, ki kam runar, bad ki jingwan kyntur pud be-aiñ kiba lah ban jia,” ong u President ka AHAM, u Kollingwath Sangma, ha ka jingthoh.
