Shillong Nailar 08
Ka jingpynkynriah ka sorkar ïa ki nongshong die madan na Khyndai Lad sha Meghalaya Urban Development Authority (MUDA) ka la long ka jingplie lad ïa ki nongtem guitar ki bym ïohi ki khmat ban wan shong ha katei ka lynti ïaid kjat ha Khyndai Lad ban ïoh jingïarap na ki paidbah.
Kane ka long ba ki arngut ki rangbah Khasi ki bym ïohi ki khmat kiba ju shong tem guitar ha Motphran ki la wan ban shong sa ha lynti ïaid kjat ha Khyndai Lad hadien ba ka sorkar ka la pynkynriah lut ïa kiba shong die madan sha jaka ïeng kali ha MUDA.
Na ka liang u nongthoh khubor u Nongsaiñ Hima ha ka sngi Thohdieng ka 08 tarik u Nailar 2025 u la leit ban ïakynduh kyrpang ïa kitei ki rangbah ba shong tem guiter ha Khyndai Lad. Haba ïoh ban ïakren bad kitei ki rangbah kiba ju shong tem ha Motphran ha ka lynti ban leit shapoh ïewduh ki la ïathuh ba ka jingkynriah jong ki ban wan shong noh ha Khyndai Lad kadei namar ba ki sngew synei ïa ki paidbah ba ïaid lynti namar teng teng ka pynwit ïa ki.
Ki la ïathuh ba ha kapor ba ki shong ha Motphran ki paidbah kiba leit shapoh ïewduh ki kum woh ïa ka guitar kaba ki tem namar ba ka guitar ka bam jaka bha bad ka jaka ruh ka long kaba khim bha.
Kine baroh arngut ki rangbah kidei kiba la don la ki khun ki kti bad lyngba kane ka kam ba ki wan ban tem guitar ha Khyndai Lad ka long ban bsa ïa ki khun bad ban pyndap ïa ka ïing kasem.
Shuh shuh ki la pynpaw ruh ba ka jingpynkynriah ïa ki nongshong die madan ka la ïarap shibun namar ba ïarap ruh ïa kito kiba duna dkhot met kiba pyndonkam da ka wheelchair, kumjuh ruh kane ka jingkynriah noh na katei ka jaka ka pynlong ruh ïa ki nongshong die madan ba kin suk bad kiba duna dkhot met ruh kin suk bad ruh kan pyllait na ka jing khapngiah bad ka jingdheng kali.
Haba ïadei bad ka jingïarap na ka liang jong ki, ki la ong ba kim pat nang ban batai ha kano ka jaka ba kham lah ban ïarap hynrei ha Khyndai Lad mynta te ka kham biang malu mala bad kim pat sngewthuh namar ba ki dangwan ban shong tang shiphang.
“Naduh ba ki paralok jong ngi ki la kohnguh ban leit shong noh shapoh MUDA ka la ïarap shibun ïa ngi bad ka long kaba kylluid ba ngin wan ban shong tem ha kane ka jaka. Kam pynwit shuh ïa ki paidbah ba ïaid ba ïeng ruh” ki la ong. Nalorkata, ki la ai khublei ïa ki paidbah ba shong hapoh ïewduh bad kiba ïaid lynti na katei ka jaka ba ki la kyrshan bha ïa ki naduh ba ki dangshong beit ban tem sha kitei ki jaka bad kiba la ïarap ha ki liang baroh.
