Ka Jaidbynriew Khasi ka da ñiewkor bha ïa ka jait ka kynja. Ka jait ka long kaba kongsan eh ha ka imlang ka sahlang u Khasi – Khasoi. Namar ïa ka jait ki shim na ka liang jong ka kmie.Kumta ki ñiewkor bad ki bat skhem ïa la ka jait ka kynja, la phi dei u shynrang ne kynthei ruh. Kim ju shim kulmar ïa ka jait ka khong kiwei. Ka jait kaba da long kordor eh ha ka jaitbynriew Hynñiewtrep Hynñiewskum.
Ki shynrang ne kynthei ki bat skhem ïa ka jait na ka liang jong ka kmie. Ym kum kiwei ki jaitbynriew khamtam ki kynthei lei kim ju bat shuh ïa ka jait jong ka kmie. Ki shim jait thymmai na u tnga ne u shynrang. Ka jait ha u Khasi ka pynïatylli ïa ka kur kaba dei na ka liang jong ka kmie (Mother side) shi kur kim ju ïa shongkha namar ki kheiñ sang namar ki dei na kajuh ka jait ka kynja.
Kane ka rukom kheiñ jait shim jait ha ngi ki Khasi ka long kum ka dak ka jingburom ïa la ka kmie ba kha ba pun. Kim ju kham kylla jait lait noh iwei ar kiba shim ïa ka jait u tnga. Ki Khasi kim ju ïehnoh ïa ka jait jong ka kmie. Dei tang kito kiba ioh tnga bar jylla ki ju shim bad tang jait thymmai da kaba ki shim shiteng ïa ka jait u tnga bad shiteng ïa ka jait ka tnga. Ka jait ka long kum u diengbah uba skhem ha ngi ki Khasi.
C. B. Iawphniaw
