Shillong, Nailar 08
U Chief Secretary ka Jylla, Bah D.P. Wahlang u la ong ba ka Meghalaya Public Service Commission Reforms Committee (MPSCRC) ka la ai jingmut ban wanrah ïa ki jingkylla bapher-bapher.
Kawei na ki jingkylla kaba la ai jingmut da ka komiti ka long ban pynduh noh ïa ka ‘Optional’ ha ka eksamin Meghalaya Civil Service (MCS) na bynta ban pyntikna ïa ka jingïakhun kaba ïaryngkat kyrdan na bynta baroh ki kyrtong.
Ïa kane la mynjur da ka Kynhun Myntri ka Jylla, ong u Bah Wahlang haba kren sha ki nongthoh khubor ha ka Sngi Thohdieng.
U la ong ba ïa ki sobjek ‘Optional’ yn bujli noh da ki ‘General Studies’, da kaba pyntikna ba baroh ki kyrtong kin ïakhun na bynta ki juh ki sobjek (Papers).
Ki kyrtong kin ym don shuh ka lad ban jied ïa ki sobjek ba kyrpang, hynrei ha ka jaka kane, kin hap ban ïakhun na bynta ki ‘General Studies’.
“Ngi la shim ïa ka rai da ka jingsngewthuh ba ka long kaba kongsan ba ngin don ïa ka rynsan ïakhun kaba ïaryngkat kyrdan, namarkata, yn ym don shuh ki sobjek ‘Optional’ na bynta ki eksamin MCS hynrei tang ki ‘General Studies’. Kin don bun tylli ki kot ‘General Studies’ hynrei kan long kajuh na bynta baroh ki khynnah shynrang bad kynthei kiba ïakhun na bynta ki eksamin tang ban pyntikna ïa ka rynsan ïakhun kaba ïaryngkat kyrdan namar bunsien ngi ïohi ba kito kiba ïakhun ha katto-katne ki sobjek ki ïoh kham palat ïa kiwei pat kiba ïakhun ha ki sobjek kiba kham eh,” u la ong.
U Bah Wahlang u la pynbna ruh ba yn wanrah sa kawei pat ka ‘Paper’ ba kyrpang halor ka Meghalaya, ha kaba yn pynleit jingmut halor ka riti-dustur jong ka Jylla, ka histori, bad ki jingthmu na bynta ka roi ka par.
Kane ka jingwanrah jingkylla ka thmu ban pyntikna ïa ka rynsan ïakhun kaba ïaryngkat kyrdan na bynta baroh ki kyrtong, da kaba pynduh ïa kano-kano ka jingmyntoi ne jingduhnong namar ka jinglah ban jied ïa ki sobjek ‘Optional’.
U Chief Secretary u la batai ba ïa kane ka rai la shim ban weng ïa ka jingeh jong katto-katne ki sobjek kiba lah ban ïoh ‘mark’ kham bun ban ïa kiwei – kaba lah ban ktah pat ïa ka lad jong ki kyrtong na ki bynta bapher-bapher.
Shuh shuh u la ai nuksa halor ki eksamin MCS ba dang shu dep, ha kaba ki kyrtong kiba ïakhun ha ka ‘Geography’ ki ïoh kham bun ïa kito kiba wan na kiwei pat ki sobjek kum ka ‘Commerce’ bad ‘English’.
