Shillong Nailar 08
Ha ka 08 Tarik u Nailar 2025 ki katto katne ngut ki nongdie jingdie madan ki la mih kynsan kynsan ban ïakhih da kaba shong kyllaiñ mungor ha Khyndai Lad ha ryngkat bad rah ruh da ki Pla Card.
Kane ka jingïakhih shong kyllaiñ mungor ki nongdie jingdie madan ha Khyndai Lad kadei ban dawa naka Shillong Municipal Board (SMB) ban ai noh ïa ki syrnod Certificate of Vending (COV) ki bym pat ïoh haduh mynta.
Haba ïakren bad ki longkmie ba wan rah plakad hynne ka sngi ki la ïathuh ba mynta la kumba 1 bnai eiei ki la duh ban shong die jingdie namar ba kim pat don ïa ka COV bad ka sorkar ruh kam shah ïa ki ban shong hapoh MUDA.
“Ki bym dei hok ban ïoh ïa ka COV ruh ki ïoh bad ïoh shong shapoh MUDA katba mangi pat ba dei hok ban ïoh ym shem la pat ïoh haduh mynta” ki la ong.
Shuh shuh ki la kynnoh ba ka sorkar ka ai COV sop-sop ïa ki briew namar ki bym dei ban ïoh shong shapoh MUDA ruh ki ïoh ban shong bad ïangi pat kiba dei hok ban shong kim ai.
Ki la ïathuh ba ki la leit ban mih man kapor sha ophis ka SMB halor ka jingbym ïoh ïa ka COV hynrei ka SMB pat ki phah sha u Bah Paul, u Bah Paul pat u phah sha u Bah Khaiñ bad ki shu phah kyllaiñ jalabi, da kaba bynrap ba kumno ki shu phah kyllaiñ ïangi ban leit na wei sha wei. Ka Municipal ïa ki briew ba ka mon ka ai ka COV ïa ki bym mon pat kam ai.
Ki la dawa ruh ba ka sorkar kadei ban ïathuh ïa kadaw ba balei kim ai ïa ka COV haduh mynta ïa ki? namar la 1 bnai mynta ki la leit ban ïakynduh ïa ki nongpynïaid ki shu ong beit ban ap ynda la don ka jingïalang, hynrei mynta ynda ladep ka jingïalang ruh kim shem pat ai ïa ka COV.
“Namar ba ka jingïakynduh ruh ka la kut. Ngin ap sa lano kata ka jingïalang, ki jingkular kim shem poi shaei shaei ruh. Kumta ngi sa mih ban pynlong noh da ki jingïakhih” la bynrap ki nongshong die madan.
Na ka liang ka nongaibuit (Adviser) jong ka seng ki nong die madan ba hap hapoh ka shatri jong ka Meghalaya & Greater Shillong Progressive Hawkers and Street Vendors Association (MGSPHSVA) ka Kong Angela Rangad ka la kynnoh ba kane ka jingpynslem ka SMB ban ai COV ïa ki nongdie jingdie madan kadei namar ba ka SMB ka kwah ba ki nongdie jingdie madan kin ïap thngan.
Ka Kong Angela ka la ïathuh ba ka jingïalang jong ka PTVC ha ka 06 tarik, ki nongdie jingdie madan kila kyntu ïa u CEO ban pynsted ka jingai COV namar ki nongdie jingdie madan mynta la 1 bnai tam, ki khlem ïoh ban kamai hadien ba la shah weng noh na Khyndai Lad.
“Ha ka jingïalang ngi ka kyntu ïa u CEO ban khot kyrkieh ïa ka jingïalang ban ai noh ïa ki COV hynrei u CEO u la ong pynban ban thaw da ka Sub-Commiittee ban ïakren halor kane ka mat” la ong ka Kong Angela.
Ka Kong Angela kala kam ruh ba ki don sa kumba 60-70 ngut ki nongdie jingdie madan ki bym pat ïoh COV bad ki don ruh kito ki bym la shah kynthup ha ka por wan leh sorjamin (Survey) da ka SMB.
Kum ban shu kdew hangne ba ha ka 06 tarik Nailar u CEO ka SMB u la lum ïa ka jingïalang jong Provisional Town Vending Committee (PTVC) ban ïakren halor katei hi ka mat. Hadien ka jingïalang ka kynhun Shillong Roadside Hawkers Association (SRHA) ka la pynpaw ba ka la hun ïa ka jingïalang ba la lum u CEO ka SMB hynrei ka la pynpaw ruh ba ki don kumba 40 ngut ki nongdie jingdie madan ki bym pat ïoh ïa ka COV.
